नंदुरबारः जेवणासाठी जाणे पडले महागात..ट्रकच्या धडकेत दोघे ठार

विसरवाडी ः राष्ट्रीय महामार्ग क्रमांक सहावर गंगापूर (ता. नवापूर) जवळ रस्त्याच्या वळणाला मालट्रकने समोरून येणाऱ्या दुचाकीला जोरदार धडक (Accident) दिली त्‍यात एक जागीच ठार झाला. तर दुसऱ्याचा उपचारादरम्‍यान मृत्यू (Death) झाल्याची घटना मंगळवार रात्री साडेनऊच्या सुमारास घडली.

गंगापूर (ता. नवापूर) गावाजवळ वळणावर धुळेकडून सुरतकडे मालट्रक (एम एच४१, एजी८०२८) भरधाव वेगाने जात असताना, चिंचपाडाकडून विसरवाडीकडे दोघे दुचाकीस्‍वार (एमएच ३९ के ६९८४) मिठूराम भागुराम वर्मा (वय ३५ रा. गिरावडी ता. उदयपुर वाटी राजस्थान) व हल्ली मुक्काम मराठी शाळा बाजार पेठ चिंचपाडा हा जागीच ठार झाला. तर मंगलदास रोहिदास वसावे (वय.२६, रा. चिंचपाडा ता.नवापुर) याचा उपचारादरम्यान मृत्यू झाला. दोघेही दुचाकीवर रात्री जेवणासाठी जात असताना अचानक समोरून येणारे माल ट्रकने समोरून धडक दिल्याने हा अपघात झाला. अपघातानंतर ट्रक चालक फरार झाला. या प्रकरणी हरिराम नथुराम वर्मा (वय. ३२, रा. गिरावडी ता. उदेपुर वाटी जि. जुजनू (राजस्थान) यांनी दिलेल्या फिर्यादीवरून अज्ञात चालकाविरोधात विसरवाडी पोलिस ठाण्यात गुन्हा दाखल झाला आहे. सहाय्यक पोलिस निरीक्षक नितीन पाटील त्वरित अपघातस्थळी धाव घेत वाहतूक सुरळीत केली.