पालिकांमध्ये प्रारूप प्रभागरचनेचा आराखडा तयार करण्यास वेग

जळगाव : जिल्ह्यात डिसेंबर २०२१ ते फेब्रुवारी २०२२ मध्ये मुदत संपणाऱ्या पालिकांच्या निवडणुकीच्या दृष्टीने तयारीला सुरवात झाली आहे. यानुसार प्रारूप प्रभागरचनेचा कच्चा आराखडा तयार करण्याचे निर्देश राज्य निवडणूक आयोगातर्फे सर्व जिल्हाधिकाऱ्यांसह पालिकांच्या मुख्याधिकाऱ्यांना देण्यात आले आहेत. त्यानुसार प्रारूप प्रभागरचनेचा आराखडा तयार करण्यास १६ पालिका, नगर परिषदांमध्ये वेग आला आहे.

जिल्हा प्रशासनास प्राप्त झालेल्या राज्य निवडणूक आयोगाच्या ६ ऑगस्टच्या निर्देशानुसार जिल्ह्यातील जामनेर, शेंदुर्णी, मुक्ताईनगरचा अपवाद वगळता अन्य सर्व पालिका आणि नगरपंचायतींच्या निवडणुकीच्या प्रक्रियेस सुरवात झाली आहे. यात प्राथमिक स्तरावर भडगाव व वरणगाव नगर परिषदेची मुदत दीड वर्षापूर्वी मार्च २०२० मध्येच संपुष्टात आलेली आहे. त्यामुळे प्राधान्याने भडगाव व वरणगाव पालिकांच्या निवडणुका होऊन त्यानंतर भुसावळ, यावल, चोपडा, सावदा, फैजपूर, रावेर, बोदवड, पारोळा, पाचोरा, एरंडोल, चाळीसगाव, अमळनेर, धरणगाव तसेच नव्याने जाहीर करण्यात आलेल्या नशिराबाद नगर परिषदेची निवडणूक होणार आहे.

कोरोना संसर्गामुळे भडगाव व वरणगाव नगर परिषद, पंचायतींच्या निवडणुका पुढे ढकलण्यात आल्या होत्या. संसर्ग प्रादुर्भाव कमी झाल्याने राज्य निवडणूक आयोगाच्या निर्देशानुसार सहकार विभागातर्फे जिल्हा बँक व अन्य स्थानिक स्वराज्य संस्थांच्या निवडणुका घेण्याचे निर्देश दिले. सहकार विभागाकडून जिल्हा बँकेची मतदारयादी २७ सप्टेंबरला प्रसिद्धी केली जाणार आहे. बहुसदस्यीयऐवजी एकसदस्यीय पद्धती अंमलबजावणी करण्याचा अध्यादेश राज्य सरकारतर्फे देण्यात आला आहे. त्यानुसारही मुदत संपुष्टात आलेल्या व येत असलेल्या नगर परिषद, पंचायतींच्या निवडणुकांसंदर्भात संबंधित जिल्हाधिकारी व मुख्याधिकाऱ्यांना प्रभाग वॉर्डरचना व आरक्षण मतदारयादी प्रसिद्धी संदर्भात निर्देश देण्यात आले आहेत.