Stone Pelting At Shirsoli: शिरसोली गावात मिरवणूकीवर दगडफेक; अनेक जण जखमी, परिसरात तणावाचे वातावरण

Stone Pelting On Shiv Jayanti Procession At Shirsoli: शिरसोली (ता. जळगाव) येथे गुरुवारी (ता. २८) रात्री मिरवणुकीवर समाजकंटकांनी दगडफेक केली. दगडफेकीत गृहरक्षक दलाच्या जवानासह पाच ग्रामस्थ जखमी झाले. एमआयडीसी पोलिसांसह राखीव पोलिस दलाचा फौजफाटा घटनास्थळी दाखल झाला आहे. जखमी युवक जिल्हा पोलिस अधीक्षक डॉ. महेश्वर रेड्डी यांनी घटनास्थळी पाहणी करून पोलिस अधिकाऱ्यांना कारवाईच्या सूचना दिल्या. दरम्यान, रात्रीतून २० ते २५ जणांना ताब्यात घेण्यात आले.

शिरसोली प्र. बो. येथे गुरुवारी सायंकाळी शिरसोली प्र. बो. येथील इंदिरानगर येथून ढोल-ताशांच्या गजरात मिरवणूक निघाली होती. या वेळी तरुणांचा जल्लोष सुरू होता. रात्री सव्वाआठच्या सुमारास मिरवणूक वराड गल्लीतून जात असताना काही काळ ढोल-ताशे बंद केले.

त्याचवेळी अचानक समाजकंटकांनी दगडफेक सुरू केली. यात मिरवणुकीतील तरुण जखमी झाले. यात विशाल दिलीप पाटील (वय २५, रा. शिरसोली) मंगेश साहेबराव पाटील (३०), बाळू तुळशीराम पाटील (४५) याच्यासह गृहरक्षक दलाचा जवान पंकज सापकर या दोघांसह इतर पाच-सहा जण जखमी झाले.

जखमींना तातडीने जिल्हा रुग्णालयात रवाना करण्यात आले. घटनेची माहिती मिळताच जिल्हा पोलिस अधीक्षक डॉ. महेश्वर रेड्डी, अप्पर अधीक्षक अशोक नखाते, उपविभागीय पोलिस अधिकारी संदीप गावित आणि दंगा नियंत्रण पथकाने घटनास्थळी येऊन परिस्थिती नियंत्रणात आणली.