Jalgaon Crime News: खिडकी तोडून चोरट्यांचा घरात प्रवेश अन् कपाट तोडून दागिने लंपास

जळगाव : शहरातील दशरथनगरातील नवीन घराच्या बेडरूमची खिडकी तोडून चोरट्याने घरातील १ लाख १९ हजारांचे दागिने लंपास केले. चोरट्याने नेमके दागिने ठेवलेलेच कपाट फोडले असून, पोलिसांना परिचितांवर संशय आहे.

विपुल भारंबे (वय ३२) यांची असोदा शिवारातील शेतजमिनीचे राष्ट्रीय महामार्गासाठी शासनाने संपादन केले. शेजमिनीचा मोठा मोबदला त्यांना काही महिन्यांपूर्वीच मिळाला आहे. पूर्वी विपुल भारंबे जिल्‍हा दूध उत्पादक संघात कार्यरत होते.

आता शेती करतात. ११ ते १८ मार्चपर्यंत विपुल कुटुंबीयांसह चाळीसगाव येथे गेले होते. चोरट्याने त्यांच्या नव्या घराच्या बेडरूमच्या खिडकीची लोखंडी ग्रील काढून आत प्रवेश केला. दागिने ठेवलेल्या नेमक्या त्याच कपाटाचे लॉक तोडून चोरट्यांनी जवळपास १ लाख १९ हजारांचे सोन्याचे दागिने चोरून नेले. चांदीचे दागिने मात्र तसेच ठेवले. त्याचबरोबर घरातील सर्व साहित्य जसेच्या तसेच असल्याचे आढळून आले.

श्री. भांरबे यांनी तक्रार दिल्यावर शनिपेठ पोलिसांसह, गुन्हेशाखा, श्वान-ठसे तज्ज्ञांचे पथक घटनास्थळी पोहोचले. पाहणी केल्यावर भारंबे यांच्या घराची इत्यंभूत माहिती असलेल्या चोरट्याने घबाड मिळण्याच्या उद्देशाने चोरी केल्याचा पोलिसांचा प्राथमिक अंदाज असून, याबाबत शनिपेठ पोलिस ठाण्यात चोरट्यांविरुद्ध गुन्हा दाखल करण्यात आला आहे.