घराची दप्तरी नोंद करण्यासाठी लाच

जळगाव - नुकत्याच खरेदी केलेल्या घराची दप्तरी नोंद करून ताबा पावती देण्याच्या मोबादल्यात पाच हजाराची लाच मागणाऱ्या उपनिंबधक सहकार अधिकाऱ्यासह सहाय्यक सहकार अधिकारी यांच्यावर लाचलुचपत विभागाने कारवाई केली आहे. या कारवाईमुळे जिल्हाधिकारी कार्यालयात आज दुपारी एकच खळबळ उडाली.

तक्रारदार यांनी सिंधी कॉलनी भागात घर खरेदी केले आहे. खरेदी केलेल्या घराची दप्तरी नोंद करून त्याबाबतची ताबा पावती देण्याच्या मोबादल्यात उपनिंबधक सहकारी संस्थेत काम करणारे सहकार अधिकारी विजय सुरेशचंद्र गोसावी (वय ५४ रा. आशा बाबा नगर) आणि सहाय्यक सहकार अधिकारी चेतन सुधाकर राणे (वय ४८, रा. गणेश कॉलनी, जळगाव) यांनी पाच हजाराच्या लाचेची मागणी केली. लाच द्यायची इच्छा नसल्याने तक्रारदार यांनी लाचलुचपत विभागाच्या कार्यालयात संपर्क करून या बाबत लेखी तक्रार केली.

तक्रारीची चौकशी केल्यानंतर पोलिस उपअधीक्षक सतीष भामरे यांच्यासह पोलिस निरीक्षक संजोग बच्छाव, निरीक्षक एन. एन. जाधव, सहाय्यक फौजदार दिनेशसिंग पाटील, शैला धनगर, मनोज जोशी, जनार्दन चौधरी, सुनील शिरसाट, प्रवीण पाटील, महेश सोमवंशी, नासिर देशमुख, ईश्वर धनगर आदींच्या पथकाने लाचेची रक्कम स्वीकारताना दोघांना ताब्यात घेतले. संशयितांना उद्या न्यायालयात हजर करण्यात येणार आहे.