Jalgaon News : जळगावलगत खेडी शिवारात साकारणार वारकरी भवन; 150 भक्तांची निवासव्यवस्था

Jalgaon News : महाराष्ट्राला वारकरी संप्रदायाची मोठी परंपरा आहे. जळगाव जिल्ह्यातून असंख्य दिंड्या, पालखी दरवर्षी आषाढी एकादशीला पंढरपूरकडे जात असतात. त्यात सहभागी होणाऱ्या वारकऱ्यांच्या सुविधेसाठी जळगाव शहरालगत वारकरी भवन साकारत आहे.

आगामी नववर्षात भवनाची वास्तू सज्ज होईल. (Warkari Bhawan will be built in Shiwar village near Jalgaon news)

वारकरी संप्रदायाची परंपरा जशी महाराष्ट्राला आहे, तशी ती जळगाव जिल्ह्यालाही असून जिल्ह्यातील शेंदुर्णी, अमळनेर ही क्षेत्र प्रतिपंढरपूर मानली जातात. संत मुक्ताई मंदिर, जुन्या जळगावातील श्रीराम मंदिर संस्थानातून दरवर्षी आषाढी एकादशीनिमित्त श्रीक्षेत्र पंढरपूरला पायी वारी जाते. अमळनेर येथील पूज्य सखाराम महाराजांच्या वाडीतील वारीही त्याचाच भाग आहे.

त्यामुळे खानदेशात व जळगाव जिल्ह्यातील वारकरी राज्याच्या वारकरी परंपरेत मोठे योगदान देत आहेत. वारकऱ्यांसाठी जळगावमध्ये एखादे भक्तनिवास, भवन असावे, यासाठी वारकरी प्रयत्नशील होते. स्थानिक प्रशासन, पालकमंत्री आणि राज्य मंत्रिमंडळस्तरावर त्यासाठी सातत्याने पाठपुरावा करण्यात आला.

नियोजन समितीतून निधी मंजूर

पालकमंत्री गुलाबराव पाटील यांनी वारकऱ्यांसाठी भवन असले पाहिजे, अशी भावना गेल्यावर्षी व्यक्त करीत जिल्हा नियोजन विकास समितीतून त्यासाठी निधी देण्याची तयारी दर्शवली होती. त्यानुसार या कामासाठी आठ कोटींचा निधी मंजूर करण्यात आला. या निधीतून भवनाचे काम साकारणार आहे. ;

ट्रस्टकडे सोपविणार

सार्वजनिक बांधकाम विभागाच्या माध्यमातून वारकरी भवनाची वास्तू साकारणार आहे. वास्तू पूर्ण झाल्यानंतर हे भवन वारकऱ्यांच्या ट्रस्टकडे सोपविण्यात येईल. या ट्रस्टद्वारा भवनाचा कार्यभार चालविला जाणार आहे. त्यामुळे वारकऱ्यांची मोठी सोय होणार आहे, अशी माहिती बांधकाम विभागाचे अधीक्षक अभियंता प्रशांत सोनवणे यांनी ‘सकाळ’शी बोलताना दिली.

असे असेल भवन

खेडी शिवारात एक एकर जागेत हे वारकरी भवन साकारत आहे. त्यात शंभर ते दीडशे वारकरी एकावेळी थांबू शकतील, अशी व्यवस्था असेल. भजन, कीर्तन आदी कार्यक्रमांसाठी एक मोठे सभागृह, वारकऱ्यांना मुक्कामासाठी पंधरा ते सोळा स्वतंत्र खोल्या, बैठकीसाठी एक ‘कॉन्फरन्स हॉल’, ‘डॉर्मेट्री’ अशी व्यवस्था या ठिकाणी असेल. प्रत्यक्ष वास्तूच्या सभोवताली खुल्या जागेत वृक्ष लागवड, उद्यान केले जाईल. भवन परिसरात अथवा सभागृहात महाराष्ट्रातील संत परंपरेची ओळख दर्शविणारी चित्रे असतील.