बोदवडला भीषण पाणीटंचाई; वीस दिवसाआड पाणी

बोदवड  : उन्हाळ्याची सुरवात होत नाही तोच जळगाव जिल्ह्यात अनेक गावांना आतापासून पाणी टंचाईच्या समस्येला सामोरे जावे लागत आहेत. त्यात बोदवड शहराला भीषण पाणी टंचाई जाणवत आहे असून नागरिकांना वीस दिवसाआड पाणी मिळत आहे.

 बोदवड शहरातील पाणी टंचाई लक्षात घेता आमदार चंद्रकांत पाटील यांच्या सूचनेमुळे ओडीए जलवाहिनीचे काम युद्धपातळीवर सुरू असून, काही तांत्रिक अडचणींमुळे शहरासह तालुक्यात पाणीपुरवठा लांबणीवर पडला आहे. उन्हाळा सुरू होताच शहरात वीस दिवसाआड पाणीपुरवठा होत आहे. यामुळे नागरिकांना पाण्यासाठी रनरण फिरावे लागत आहे. 

पैसे मोजावे लागत आहे

पाण्यासाठी नागरिकांना पाचशे रूपये टँकर तर वीस रूपयांत पाणी जार घ्यावा लागत असून, नागरिकांच्या खिशाला आर्थिक झळ पोहचते आहे.

लोकप्रतिनीधी कडून टँकरने पाणीपुरवठा

या परिस्थितीत गटनेते कैलास चौधरी यांनी आपल्या दहा प्रभागासह परिसरातील भागात आतापर्यंत ३० टँकरने पाणीपुरवठा करून नागरिकांना दिलासा दिला आहे. टँकर परिसरात गेल्यावर नागरिकांना दोनशे लिटर पाणी टाकी रांगेत भरून दिली जाते. यामुळे गर्दी होत नाही आणि पाणी व्यवस्थित भरले जाते, तसेच बोदवड नगरपंचायतने याच आठवड्यात २५ लाख रूपयांचा धनादेश ओडीए योजनेकडे दिला आहे. तर पाण्याचा कर भरूनही शहरातील नागरिकांना पाण्यासाठी गरगर फिरावे लागते. ओडीए जलवाहिनीचा तांत्रिक बिघाड जोपर्यंत दुरुस्त होत नाही तोपर्यंत टँकरने पाणीपुरवठा केला जाणार आहे.

संपादन- भूषण श्रीखंडे