जळगाव : लसीकरणाची वर्षपूर्ती, मोदी सरकारचा विकासाचा उंचावता आलेख ; भोळे

जळगाव : कोविड प्रतिबंधक लसीकरणाची (Vaccination)वर्षपूर्ती हा पंतप्रधान नरेंद्र मोदी (PM Narendra Modi)सरकारच्या विकासाचा उंचावता आलेख आहे, असे मत आमदार सुरेश भोळे यांनी व्यक्त केले. गेल्या वर्षी, १६ जानेवारी २०२१ रोजी मनीष कुमार नावाच्या ३४ वर्षांच्या सफाई कर्मचाऱ्यास कोविड लसीची(Covid Vaccine) पहिली मात्रा देऊन या मोहिमेचा आरंभ करण्यात आला होता. त्याला आज एक वर्ष पूर्ण होत आहे. केंद्र सरकारच्या या यशाबाबत आमदार सुरेश भोळे यांनी म्हटले, की १४ जानेवारी २०२२ रोजी या मोहिमेअंतर्गत लसीकरणाच्या १५६ कोटी मात्रा पूर्ण झाल्या असून, ९३ टक्के जनतेचे पहिल्या मात्रेचे तर ७० टक्के जनतेचे दोनही मात्रांचे लसीकरण पूर्ण झाले आहे.

दररोज सरासरी ४३ लाख लोकांचे लसीकरण करणारी जगातील ही सर्वाधिक वेगवान मोहीम मोदी सरकारमुळेच देशात राबविली गेल्याने देशाला कोविडविरोधी सुरक्षेचे मोठे कवच प्राप्त झाले आहे. कालपर्यंत देशातील १५ ते १८ वयोगटातील ४३ टक्के युवकांना पहिली मात्रा पूर्ण झाली आहे, अशी माहितीही आमदार सुरेश भोळे यांनी दिली. मोदी सरकारच्या कोरोनाविरोधी लढाईस लसीकरणामुळे मोठे बळ मिळाले असून देशाचे जनजीवन वेगाने पूर्वपदावर येत आहे. मात्र एका बाजूला सर्वाधिक सुरक्षा उपायाचा अवलंब करतानाही जनजीवन पूर्वपदावर येण्याकरिता केंद्र सरकार अटोकाट प्रयत्न करीत असताना महाराष्ट्र मात्र पुन्हा सर्व व्यवहार बंद करून राज्याला अस्थिरतेकडे नेत आहे, असा आरोपही त्यांनी केला.(Latest Jalgaon News)