सत्तर ग्रामपंचायती मनसे लढणार : उपरकर

कणकवली (सिंधुदुर्ग) : जिल्ह्यातील ७० ग्रामपंचायतींच्या निवडणुकांमध्ये महाराष्ट्र नवनिर्माण सेना आपले उमेदवार उभे करणार आहे. गाव पॅनेलमधून निवडणूक लढण्यास इच्छुक असतील, अशा उमेदवारांनाही मनसेतर्फे सर्व ते सहकार्य केले जाईल. यासाठी प्रत्येक इच्छुकांनी मनसेच्या तालुका प्रमुखांशी संपर्क साधावे, असे आवाहन महाराष्ट्र नवनिर्माण सेनेचे सरचिटणीस माजी आमदार परशुराम उपरकर यांनी आज येथे केले आहे.

येथील मनसे कार्यालयात आयोजित पत्रकार परिषदेत ते बोलत होते. ते म्हणाले, ‘‘सत्ताधारी आणि विरोधकांना कंटाळून अनेकजण मनसेमध्ये येत आहे. त्यामुळे आगामी काळात होणाऱ्या ग्रामपंचायतींच्या निवडणुकांमध्ये स्वच्छ कारभार व्हावा, अशी जनतेची मागणी आहे. त्यामुळे जिल्ह्यातील ७० ग्रामपंचायतींपैकी बहुतांशी ग्रामपंचायतीत मनसेत स्वतःचे पॅनेल उभा करणार आहे. काही ठिकाणी गाव पॅनेल आहे किंवा वेगवेगळ्या गटाचाही पॅनेल आहेत. अशा गटांना सर्वतोपरी सहकार्य महाराष्ट्र नवनिर्माण सेना करणार आहे.

हेही वाचा - आमदार पडळकरांना आवरला नाही मोह, घेतला त्यांनी हातात औतच -

मनसेतर्फे निवडणूक लढविणाऱ्या उमेदवारांना सर्वतोपरी मदत पक्षाच्या वतीने केली जाईल. जिल्ह्यातील विविध समस्यांवर मनसेने आंदोलन छेडले आहे. कणकवलीतील भूमिअभिलेख कार्यालयातील नागरिकांच्या गैरसोयीबाबत चांगली भूमिका घेतली. परिणामी तेथे कार्यरत असलेल्या उपअधीक्षक यांची बदली होऊन नव्याने राजेंद्र रसाळ उपअधीक्षक म्हणून नेमणूक केली आहे. हे मनसेचे यश आहे. जनतेच्या प्रश्नांवर महाराष्ट्र नवनिर्माण सेनेच्या कार्यकर्त्यांनी वेळोवेळी आंदोलने केली. रस्त्यावर उतरून अनेक प्रश्‍न मार्गी लावले. 

त्यामुळे गाव विकासासाठी ज्यांना मनसेमध्ये प्रवेश करावा, अशी इच्छा आहे. राज ठाकरे यांच्यावर विश्‍वास आहे. त्यांचे विचार मानणारा जो गट आहे. त्या गटाने मनसेमध्ये येऊन ग्रामपंचायत निवडणुका लढव्यात, अशी आपली अपेक्षा आहे. जनतेच्या प्रश्‍नांसाठी राज्यभर मनसे नेते आक्रमक भूमिका घेतली असून, राज ठाकरे यांच्या मार्गदर्शनाखाली पक्षाची वाटचाल सुरू आहे. ग्रामपंचायत पातळीवर मनसेच्या माध्यमातून सर्वांनी लढा द्यावा.’’

हेही वाचा -  बिनविरोध ग्रामपंचायतीची ६२ वर्षांची परंपरा ; यंदाही परंपरा टिकवणार
 

संपादन - स्नेहल कदम