पर्यायी रस्त्यावरील लोखंडी पत्र्याला धडकून तरुणाचा मृत्यू

कणकवली (सिंधुदुर्ग) : मित्राला भेटून घरी परतत असताना मोटारसायकल महामार्गावरील चौपदरीकरणाच्या पर्यायी रस्त्यावरील लोखंडी पत्र्याला धडकून कलमठ येथील तरुणाचा मृत्यू झाला. बाबाजी ऊर्फ बाळा नांदगावकर (वय २७, रा. कलमठ कुंभारवाडी) असे त्याचे नाव आहे. अपघात मंगळवारी (२२) रात्री उशिरा जानवली-बौद्धवाडी येथे महामार्गावर झाला.

अपघातानंतर त्याला उपचारासाठी येथील एका खासगी रुग्णालयात दाखल करण्यात आले. त्यानंतर सीटीस्कॅनही करण्यात आले; मात्र त्याला गंभीर दुखापत झाल्याने अधिक उपचारासाठी पडवे येथील लाईफटाईम हॉस्पिटलला नेत असताना वाटेतच त्याचा मृत्यू झाला. याबाबत पोलिसांत उशिरापर्यंत अपघाताची नोंद दाखल झाली नव्हती. बाबाजी हा जानवलीहून कलमठकडे आपल्या घरी येत होता.

हेही वाचा -  कोकणात बिबट्याची नखे, पंजे, दात जवळ बाळगल्याप्रकरणी एकास अटक -

महामार्गावर बौद्धवाडी येथे ओढ्यालगत लावलेल्या पत्र्याला त्याच्या दुचाकीची धडक बसली. ही धडक एवढी जोरात होती की, यात बाबाजी तेथील ओहोळात फेकला गेला. रात्रीची वेळ असल्याने त्याला अंदाज आला नाही. गेल्या आठवड्यात ही असा एक अपघात त्याच ठिकाणी झाला आहे. अशा अपघातामुळे महामार्गावरील सुरक्षेचा प्रश्‍न निर्माण झाला आहे. मागील कित्येक दिवस जानवली बौद्धवाडी येथे महामार्गावरील वाहतूक एकाच मार्गाने वळविण्यात आली आहे.

महामार्ग प्राधिकरण आणि ठेकेदार कंपनी या अपघात स्थळाकडे दुर्लक्ष करित आहे. बाबाजी हा दुचाकी मेकॅनिक होता. अलीकडे तो रंगकाम करत असे. त्याच्याकडे सध्या काही ग्रामपंचायतींची फलक रंगवण्याची कामे आहेत. त्याच्या पश्‍चात आई, वडील, भाऊ, बहीण असा परिवार आहे. अपघाताची माहिती मिळतात भाजपचे युवा मोर्चा सरचिटणीस संदीप मेस्त्री, गुरुनाथ वर्देकर, सुरेश वर्देकर यांच्यासह ग्रामस्थांनी रुग्णालयात धाव घेतली; मात्र बाबाजीला वाचवता आले नाही.

हेही वाचा - क्षणातच झाले होत्याचे न्हवते ; अपघातात बापलेकाचा जागीच मृत्यू -

संपादन - स्नेहल कदम