मुंबई - गोवा हायवेवर झालेल्या भीषण अपघातात एकजण जागीच ठार

खेड (रत्नागिरी) : मुंबई - गोवा महामार्गावर कशेडी वाहतूक पोलिस टॅपजवळील एसटी - दुचाकीच्या धडकेत स्वार जागीच ठार झाला. दुचाकीवरील अन्य दोघेजण जखमी झाले. हा अपघात मंगळवारी (२३) रात्री झाला. कशेडी टॅपचे पोलिस बोडकर यांनी दिलेल्या माहितीनुसार गुहागर एसटी आगाराचे चालक दत्ताराम बाळकृष्ण महाडीक (४५) हे गुहागर ते मुंबई एसटी बस (एमएच - २० - बीएल - १५७४) घेऊन निघाले होते. कशेडी वाहतूक पोलिस टॅपजवळील अनुसया हॉटेलसमोर मध्यरात्री साडेअकरा वाजण्याच्या सुमारास महाड ते खेडकडे जाणारी मोटारसायकलने (एमएच - ०८ - एयू - १७७९) एसटीला समोरासमोर धडक दिली. दुचाकीवर तिघेजण होते. 

हेही वाचा - कोकणात होणार शासकीय अभियांत्रिकी महाविद्यालय : उदय सामंत

अपघातात दुचाकीचालक विजय प्रकाश जाधव (२१, रा. उतेकरवाडी, चोरवणे, ता. खेड) हा जागीच ठार झाला. त्याच्यासोबतचे रोहित रंगराव जाधव (२०, भरणानाका, खेड) आणि तुषार दीपक जाधव (२१, रा. उतेकरवाडी, चोरवणे, खेड) हे जखमी झाले. या वेळी महामार्ग मृत्यूंजय दूत मुकुंद मोरे, महेश रांगडे व सहदेव कदम यांनी जखमी तसेच मृताला नरेंद्र महाराज चॅरिटेबल ट्रस्टच्या ॲम्ब्युलन्सने तातडीने कळंबणी येथील उपजिल्हा रुग्णालयामध्ये दाखल केले.