..तर इच्छुकांचा पत्ता कट होणार?

रत्नागिरी : आगामी नगरपालिका निवडणुकीत वरिष्ठांनी आदेश दिले तर शिवसेना (Shivsena) ही राष्ट्रवादी (NCP) काँग्रेसबरोबर आघाडी करू शकते, असे संकेत नगरसेवकांसह पदाधिकाऱ्यांना आढावा बैठकीत पक्ष पदाधिकाऱ्यांनी दिले. याविषयी शिवसैनिकांत लगेचच प्रतिक्रिया उमटत असून, बहुसंख्य शिवसैनिकांनी स्वबळावर निवडणूक लढवण्याची सूचना केली. (Konkan News)

नगरपालिका निवडणुकीच्या पार्श्वभूमीवर रविवारी (१२) संध्याकाळी उच्च व तंत्र शिक्षण मंत्री उदय सामंत (Uday Samant) यांनी बैठक घेतली. यावेळी सर्व नगरसेवक, शहरातील शाखाप्रमुख, विभागप्रमुख यांच्यासह प्रमुख पदाधिकारी उपस्थित होते. पालिका निवडणुकीला सामोरे जात असताना गेल्या पाच वर्षांत केलेली कामे, नागरिकांच्या मागण्या, नगरसेवकांनी घेतलेल्या बैठकांना मिळालेला प्रतिसाद, भविष्यात करावयाची कामे यांचा आढावा घेण्यात आला. बैठकीत प्रत्येक नगरसेवकाचे आघाडी विषयाचे मत जाणून घेण्यात आले. सर्व नगरसेवकांनी आघाडीपेक्षा स्वबळावर निवडणुका लढवण्याची तयारी दर्शवली. आपल्याकडे प्रत्येक प्रभागात उमेदवार उभे करता येतील. सध्या सुरू असलेली कामे येत्या काही दिवसांत पूर्ण होतील. त्यामुळे शिवसेनेला चांगले यश मिळू शकेल, असा विश्वास अनेकांनी व्यक्त केला.

प्रत्येक इच्छुकाने शिवसैनिक म्हणून काम करावे. निवडणुकीपूर्वी काही दिवस आधी उमेदवारांची घोषणा केली जाईल. तोपर्यंत पक्ष म्हणून काम करत राहावे. बंडखोरी कोणीही करू नये. प्रत्येकाला कुठे ना कुठे संधी दिली जाईल, असे मंत्री सामंत यांनी सांगून आघाडीचा निर्णय वरिष्ठ पातळीवर होईल, अशा सूचना दिल्या.

इच्छुकांचा पत्ता कट होणार

आघाडी झाली तर काही इच्छुकांचा पत्ता कट होणार हे निश्चित आहे. हा फटका कुणाला बसणार यावरून अंदाज बांधले जात आहेत. तसेच निवडणुकीपूर्वी आठ दिवस उमेदवारांना तिकीट मिळणार असल्यामुळे गोंधळात भर पडली आहे.

"आगामी निवडणूक लक्षात घेऊन आढावा बैठक घेण्यात आली आहे. त्यामध्ये सर्वांना सज्ज राहण्याच्या सूचना देण्यात आल्या आहेत. आघाडीबाबत मतेही जाणून घेण्यात आली."

- बिपीन बंदरकर, शहरप्रमुख, रत्नागिरी