नातीच्या चेहऱ्यावर हास्य अन्‌ आजोबांना आनंदाश्रू 

चिपळूण - नातीच्या शास्त्रक्रियेसाठी गाठीला पैसे नसल्याने हतबल झालेल्या आजोबांच्या मदतीसाठी येथील सामाजिक कार्यकर्ते राजेश चव्हाण आणि सहकारी देवासारखे धावले. प्रयत्नांची पराकाष्ठा करत त्यांनी ती शस्त्रक्रिया यशस्वीही केली. या उपचारानंतर प्रेरणा शिंदे या मुलीच्या चेहऱ्यावरचे हास्य अन्‌ आजोबांच्या डोळ्यांतील आनंदाश्रू पाहून या मदतकर्त्यांचे डोळेही अलगद पाणावले. 

खेर्डी एमआयडीसी परिसरात राहणारे संतोष सावंत हे शहरातील पाग येथील कृष्णेश्वरनगर सहकारी गृहनिर्माण संस्थेमध्ये वॉचमन आहेत. 24 जूनला सोसायटीमधील राजेश चव्हाण आले असता त्यांना वॉचमन सावंत डोक्‍याला हात लावून बसलेले दिसले. चौकशी करताच त्यांनी आपल्या 9 वर्षाच्या प्रेरणा नीलेश चव्हाण या नातीच्या आजारपणाची माहिती दिली. प्रेरणा ही त्यांच्या मुलीची मुलगी. गेले 4-5 दिवस तिच्या पोटात अन्न जात नाही. खाल्ले की खूप दुखते. गेले 5 ते 6 महिने तसेच चालू आहे. चिपळुणातील खासगी डॉक्‍टरांनी अपेंडीक्‍स असून 30 हजार रुपये खर्च सांगितला. गेले चार महिने लोकडाऊन आहे. एवढा पैसा कुठून आणायचा या विवंचनेत ते असल्याचे चव्हाण यांच्या लक्षात आले. ऑपरेशनसाठी सरकारी योजनेचा आधार घ्यायचा असे चव्हाण यांनी ठरवले. त्यानंतर मदतीचा प्रवास सुरू झाला. पप्या चव्हाण, सहाय्यक पोलिस निरीक्षक चंद्रकांत लाड, गुहागर तालुका आरोग्य अधिकारी डॉ. राजेंद्र पवार, पेडामकर, एक्‍सेल कंपनीचे एचआर मॅनेजर आनंद पाटणकर, विनती ऑर्गेनिक कंपनीचे प्रॉडक्‍ट मॅनेजर, बिपीन चिले यांसारख्यानी योगदान दिले. खासगी तीन ते चार रुग्णालयांमध्ये डॉक्‍टरांनी तातडीने शस्त्रक्रिया करून घेण्याचा सल्ला दिला. योजनेमधून शस्त्रक्रिया करून देण्यासही संमती दर्शवली. योजनेचा लाभ घेण्यासाठी रेशनकार्डवर तिचे नाव व रहिवासी दाखला नसल्याने अडचणी निर्माण झाल्या. राजेश चव्हाण व त्यांच्या सहकाऱ्यांनी कागदपत्रांच्या पूर्ततेसाठी प्रयत्न केले.

हे पण वाचा -  फिल्मी स्टाईलने वेंगुर्लेत पोलिसांनी केला त्या गाडीचा पाठलाग अन्.... 

नायब तहसीलदार शेजाळ, मनोज पवार, प्रकाश पाथरूड यांनीही सहकार्य केले. प्रेरणावर चिपळुणातील एसएमएस हॉस्पिटलमध्ये डॉ. परमेश्वर गौड यांनी यशस्वी शस्त्रक्रिया केली. आजारपणातील वेदनांना पूर्ण विराम मिळाल्याने तिच्या चेहऱ्यावर हास्य उमटले आणि तिच्या आजोबांनीही हात जोडत सर्वांचे आभार मानले.