उपनगराध्यक्ष भोजनेंविरोधात अविश्‍वास मंजूर ; चिपळूणात १४४ वर्षांत पहिलीच घटना

चिपळूण (रत्नागिरी) : उपनगराध्यक्ष निशिकांत भोजने यांच्यावर महाविकास आघाडीने आणलेला अविश्‍वास ठराव विशेष सभेत मंजूर करण्यात आला. अविश्‍वास ठराव मांडता येईल का, यावर नगराध्यक्षांनी मुख्याधिकाऱ्यांचे मार्गदर्शन घेतले. त्यानंतर ठराव मांडण्याची परवानगी दिली.

चिपळूण पालिकेच्या १४४ वर्षांच्या इतिहासात उपनगराध्यक्षांविरोधात अविश्‍वास ठराव संमत होण्याची ही पहिलीच घटना. पालिकेत महाविकास आघाडी स्थापन झाल्यानंतर विषय समित्यांवर वर्चस्व मिळवले. त्यानंतर भाजपकडून उपनगराध्यक्षपद काढून घेण्यासाठी मागील तीन महिने महाविकास आघाडीचे प्रयत्न सुरू होते. 

हेही वाचा - चारशे वर्षांनंतर गुरु-शनि महायुतीचा सोमवारी नजारा

काहींनी भोजनेंना राजीनामा देण्याची सूचनाही केली होती. मात्र, भोजने हे कायद्याचे माहितगार असल्यामुळे ते राजीनामा देणार नाहीत. कायद्याच्या चौकटीत उपनगराध्यक्षपद वाचवण्यासाठी प्रयत्न करतील, याची जाणीव सर्वांना असल्यामुळे महाविकास आघाडीने त्यांच्याविरोधात अविश्‍वास ठराव दाखल करण्याचा निर्णय घेतला. 

नगराध्यक्षांनी आज बोलावलेल्या सभेला भोजने वगळता सर्व सदस्य उपस्थित होते. महाविकास आघाडीच्या मागणीचे वाचन झाले. त्यावर विजय चितळे यांनी आक्षेप घेतला. भोजने यांना पदावरून हटवण्याचे नेमके कारण मागणी पत्रात नाही, त्यामुळे आजची सभा रद्द करावी. भोजने विरोधात कारण देत त्यानंतर सभा घ्या, अशी मागणी केली. 

नगराध्यक्षांनी मुख्याधिकाऱ्यांकडे मार्गदर्शन मागितले. उपनगराध्यक्षांवर अविश्‍वास ठराव दाखल करण्यासाठी बोलविण्यात आलेल्या सभेत ठराव दाखल झाला नाही किंवा बहुमताच्या आधारे फेटाळण्यात आला, तर पुन्हा अविश्‍वास ठराव घेता येत नाही, अशी तरतूद असल्याचे मुख्याधिकाऱ्यांनी सांगितले. नगराध्यक्षांचे समाधान न झाल्याने त्यांनी कायद्याची बाजू समजून घेण्याचा प्रयत्न केला.

हेही वाचा - अंधश्रद्धेचा विळखा घट्टच; भानामतीच्या मडक्‍याची जोरदार चर्चा

वरिष्ठांकडून मार्गदर्शन घ्या, अशी सूचनाही केली. त्यावर मुख्याधिकाऱ्यांनी मी वरिष्ठांचे मार्गदर्शन घेतले तरी निर्णय तुम्हालाच घ्यायचा आहे, असे स्पष्ट केल्यानंतर नगराध्यक्षांनी भोजने यांच्या विरोधात ठराव मांडण्याची परवानगी दिली. अविनाश केळस्कर यांनी ठराव मांडला. ठरावाच्या बाजूने २२ जणांनी मतदान केले. 

संंपादन - स्नेहल कदम