वाहतूक नियंत्रणासाठी असा जालीम उपाय

वैभववाडी (सिंधुदुर्ग) - वाहतूक नियंत्रणासाठी पोलिसांनी खारेपाटण गगनबावडा मार्ग बंद केला आहे. करुळ येथील तपासणी नाका टाळण्यासाठी वाहनचालक भुईबावडा घाटमार्गाचा वापर करु लागले होते. त्यामुळे तिथवली आणि भुईबावडा घाटपायथ्याजवळ रिंगेवाडी येथे मातीचा ढीग रचून मार्ग बंद करण्यात आला आहे. त्यामुळे तळेरे खारेपाटण परिसरातील किराणा खरेदीसाठी कोल्हापूरात गेलेली वाहने काही काळ भुईबावडा घाटपायथ्याशी अडकली होती. 

कोरोनामुळे संचारबंदी जाहीर होताच जिल्ह्याच्या सीमा बंद करण्यात आल्या. पोलीस ठोस कारणाशिवाय वाहने जिल्ह्याबाहेर वाहने सोडत नाहीत. किंबहुना बाहेरील वाहनांना जिल्ह्यात प्रवेशही देत नाहीत. त्यामुळे शुल्लक कारणांसाठी फिरणाऱ्यांची चांगलीच नाकेबंदी झाली आहे. 
करुळ येथील पोलीस तपासणी नाका टाळण्यासाठी सुरुवातीस काही वाहन चालकांनी भुईबावडा घाटमार्गांचा उपयोग केला; परंतु गेल्या चार-पाच दिवसांपासून भुईबावडा घाटातील वर्दळ मोठ्या प्रमाणावर वाढल्याचे गगनबावडा पोलिसांनी निदर्शनास आणून दिले. त्यामुळे वैभववाडी पोलिसांनी जिल्हा प्रशासनाच्या परवानगीने खारेपाटण गगनबावडा मार्ग तिथवली व रिंगेवाडी येथे बंद केला आहे. 

आज दुपारी खारेपाटण, तळेरे परिसरातील काही वाहने भुईबावडा घाट उतरुन आल्यानंतर रिंगेवाडीत अडकली. त्यातील काही वाहन चालकांनी रस्त्यावरील मातीच्या ढीगाऱ्यामुळे थांबलेल्या वाहनांची छायाचित्र वॉटसअपवर व्हायरल करुन स्थानिक नागरिकांनी रस्ता बंद केल्यामुळे वाहन अडकल्याचा भास निर्माण करीत पोलिसांशी संपर्क साधण्याचे आवाहन केले. त्यामुळे वैभववाडीचे सहाय्यक पोलीस निरीक्षक दत्तात्रय बाकारे यांच्याशी संपर्क साधला असता, भुईबावडा घाटातून अनाठायी वाहतूक सुरु होती.

लोक सांगून ऐकत नाहीत. त्यामुळे जिल्हा प्रशासनाच्या परवानगीने खारेपाटण गगनबावडा मार्ग वाहतुकीस बंद करण्यात आला आहे. अत्यावश्‍यक बाबीसाठी किंबहुना जीवनावश्‍यक वस्तू खरेदीसाठी प्रशासनाकडून वाहन चालकांना परवाने दिले जात आहेत. ते रीतसर परवाने घेऊन किराणा वाहतूक करावी, असे आवाहन बाकारे यांनी केले आहे.