Fish Market Malvan : PM मोदींचा दौरा अन् नौदल दिन.. सामसूम पडलेल्या मासळी बाजारात पुन्हा मोठी गर्दी, जलक्रीडाही सुरू

मालवण : नौदल दिनाच्या (Navy Day) पार्श्वभूमीवर येथील बंदरात मासेमारी नौका आणि सागरी पर्यटन व्यवसायाचे उपक्रम बंद ठेवण्यात आले होते. मात्र, आता नौदल दिनाचा कार्यक्रम पार पडल्यानंतर मच्छीमारांनी पुन्हा एकदा आपल्या नौका समुद्रात लोटून मासेमारी करण्यास सुरुवात केली आहे.

परिणामी सामसूम पडलेल्या मासळी बाजारात (Fish Market) काल मोठी गर्दी पहावयास मिळाली. दांडी, तारकर्ली, देवबाग येथील सागरी पर्यटन व्यावसायिकांनीही वॉटर स्पोर्ट्स केले असून किनाऱ्यांवर पर्यटक दिसू लागले आहेत. नौदल दिनामुळे सागरी सुरक्षिततेच्या कारणास्तव येथील बंदरातील सागरी पर्यटन आणि मासेमारी बंद ठेवण्यात आली होती.

यामुळे पर्यटन (Tourism) व्यावसायिकांनी आपल्या नौका आणि वॉटरस्पोर्ट्सचे साहित्य किनाऱ्यावर आणले होते. याचा परिणाम म्हणून येथील पर्यटन व्यवसाय पूर्णतः ठप्प झाला होता. पर्यटक नसल्यामुळे किनारे ओस पडले होते. आता नौदलाच्या नौका माघारी गेल्या आहेत. तसेच शासनाकडून जाहीर केलेली बंदीची मुदत संपली असल्याने पर्यटन व्यावसायिकांनी समुद्रात आपले सागरी पर्यटनाचे उपक्रम सुरू केले आहेत. आज किनाऱ्यांवर काही प्रमाणात पर्यटकांची वर्दळ पहावयास मिळाली.

माशांचे दर चढे राहण्याची शक्यता

येथील बंदरात नौदलाच्या युद्धनौकानी तळ ठोकल्यामुळे मागील काही दिवस किनाऱ्याजवळील मासेमारी येथील मच्छीमारांनी बंद ठेवली होती. यामुळे येथील मासळी बाजारात मासळीची आवक घटली होती. मासळी बाजारात शुकशुकाट दिसत होता. (ता.५) बंदरातील मासेमारी नौका समुद्रात मासेमारीसाठी जावू लागल्यामुळे आज मासळी बाजारात मोठी गर्दी पहावयास मिळाली. मासेमारी सुरू झाली असली तरीही माशांचे दर काही दिवस चढे राहण्याची शक्यता आहे.