शासनाने आमचा व्यवसाय बंद केल्यास खायचे काय? हातावर पोट असणाऱ्यांचा प्रश्न

चिपळूण (रत्नागिरी) : कोरोना संसर्ग रोखण्यासाठी प्रशासनाने कडक निर्बंध लादल्याने त्याचा सर्वाधिक फटका हातावर पोट असणारे वडापाव, चुरमुरे, चहा, रस विक्रेते, हॉटेल, खानावळ, पानदुकान व सलून व्यावसायिकांना बसला आहे. आता आपला व कुटुंबीयांचा उदरनिर्वाह कसा करावयाचा? असा प्रश्न त्यांना पडला आहे. कोरोनाचा संसर्ग वाढल्याने प्रशासनाने कडक निर्बंध लावले आहेत. त्याची सक्त अंमलबजावणी मंगळवारपासून सुरू झाली. सकाळपासून शहरात फिरून पालिका व पोलिसांनी अत्यावश्‍यक सेवा वगळता, अन्य सर्वच व्यावसायिकांना दुकाने बंद ठेवण्याचे आवाहन केले. व्यापारपेठ बंद झाल्याने शहरातील वर्दळ कमी होऊन सर्वत्र शुकशुकाट निर्माण झाला.

कडक निर्बंधाचा सर्वाधिक फटका हातावर पोट असणाऱ्या कामगार वर्गाला बसला. कापड दुकान, स्टेशनरी, हार्डवेअर, सराफ आदी व्यवसायात काम करणाऱ्या मजुरांना घरी बेकार बसण्याची वेळ आली आहे. हॉटेल, खानावळ, वडापाव, पानदुकानदार, चहा व रसविक्री करणारे, हातावर पोट असणाऱ्यांना तसेच रस्त्याच्या कडेला बसून माठ विक्री करणारे कुंभार, बूट पॉलिश करणारे गटई कामगार, देवी-देवतांच्या मूर्ती विक्री करणारे कारागीर, फुगे, खेळणी विक्री करणारे, सराफाच्या दुकानांसमोर विणकाम करणाऱ्यांना या कडक निर्बंधाचा फटका बसला आहे. आता खायचे काय? असा प्रश्न त्यांच्यासमोर आहे.

हेही वाचा - कोकण रेल्वेत विना मास्क प्रवास केल्यास होणार कारवाई
 

"गेली आठ-नऊ महिने आमचे धंदे बंद होते. मोठ्या आर्थिक समस्यांना तोंड द्यावे लागले. आता कुठे सुरळीत धंदे सुरू झाले, पण पुन्हा कोरोना संसर्ग वाढल्याने आमच्यावर दुकान बंद ठेवण्याची सक्ती करण्यात आली. आम्ही कोरोना संसर्गापासून बचाव करण्यासाठी सर्व उपाययोजना करून सलूनचा व्यवसाय करू, पण आम्हाला आमचा धंदा सुरू करण्यास परवानगी द्या."

- अजित चव्हाण, सलून व्यावसायिक खेर्डी

"कोरोना संसर्गामुळे महिनाभर लादलेल्या कडक निर्बंधामुळे आमच्या रोजगाराचा प्रश्न निर्माण झाला आहे. शासनाने आमचा व्यवसाय बंद केल्यास खायचे काय, आता शासनाने आमची उपासमारी टाळण्यासाठी रेशनवरील धान्य देण्याची व्यवस्था करावी."

 - सुनील बावदाने, रसविक्रेता चिपळूण