ग्रामपंचायत निवडणूका लढविण्यासाठी `येथे` काँग्रेसची तयारी

सिंधुदुर्गनगरी - राष्ट्रीय कॉंग्रेस पक्ष संघटना वाढीसाठी बुथ कमिट्यांचे पुर्नगठन करून आगामी ग्रामपंचायत निवडणूका स्वबळावर अथवा महाआघाडीतर्फे लढविणार असल्याची माहिती राष्ट्रीय कॉंग्रेसचे सरचिटणीस प्रकाश जैतापकर यांनी आज दिली. 

सिंधुदुर्ग जिल्हा राष्ट्रीय कॉंग्रेसची मासिक सभा जेष्ठ नेते साईनाथ चव्हाण यांच्या अध्यक्षतेखाली ओरोस येथील जिल्हा कॉंग्रेसच्या कार्यालयात झाली. याबाबतची माहिती प्रकाश जैतापकर यांनी देताना आजच्या सभेत बुथ कमिट्याचे पुनर्गठन करण्याचा निर्णय घेतला आहे. बुथ कमिट्या पुनर्गठीत करून जिल्ह्यातील पक्ष संघटना मजबूत करण्यात येणार आहेत. त्या ठिकाणी कॉंग्रेसचे पॅनल किंवा शक्‍य त्या ठिकाणी महाआघाडी करून निवडणूका लढविण्याचा निर्णय घेण्यात आला आहे. कॉंग्रेस पक्षाच्या माध्यमातून विकासकामे करण्यासाठी शासनपातळीवर प्रयत्न करणार असल्याचे यावेळी जैतापकर यांनी स्पष्ट केले. 

या बैठकीस माजी आमदार पुष्पसेन सावंत, राजू मसुरकर, नागेश मोर्ये, दिलीप नार्वेकर, बाळा गावडे, श्रीकृष्ण तळवडेकर, निता राणे, विभावरी सुकी, सुगंधा साटम आदी पदाधिकाऱ्यांसह कॉंग्रेस कार्यकर्ते मोठ्या संख्येने उपस्थित असल्याची माहिती जिल्हा सरचिटणीस प्रकाश जैतापकर यांनी दिली. 

महिला आघाडीच्या जिल्हाध्यक्षपदी वंजारे यावेळी पदाधिकारी निवडही झाली. यात महिला आघाडी जिल्हाध्यक्ष म्हणून साक्षी वंजारे यांची तर सेवादल वेंगुर्ले तालुका अध्यक्षपदी विजय खाडे याची नियुक्‍ती करण्यात आली.