धक्कादायक ; ९० वर्षांच्या वृद्धेवर अत्याचार

दाभोळ (रत्नागिरी) : दापोली तालुक्‍यातील एका गावामध्ये एका ९० वर्षीय वृद्धेवर भरदुपारी अत्याचार केल्याचा घृणास्पद प्रकार घडला. दापोली पोलिसांनी या संदर्भात एका संशयिताला अटक केली असून त्याला न्यायालयासमोर हजर केले असता, न्यायालयाने त्याला दोन दिवस पोलिस कोठडीत ठेवण्याचे आदेश दिले.

याबाबत दापोली पोलिस ठाण्यातून मिळालेल्या माहितीनुसार, दापोली तालुक्‍यातील एका गावामध्ये १९ डिसेंबर रोजी दुपारी १२.३० वाजण्याच्या सुमारास ९० वर्षीय वृद्धा घरी एकटीच असल्याचा फायदा घेऊन एक अनोळखी इसम घराच्या दरवाजातून आत आला व त्याने दरवाजा लावून घेतला व या वृद्ध महिलेवर अत्याचार केला होता. ही घटना घडली तेव्हा, या वृद्धेची सून त्या वेळी बाहेर गावी होत्या. 

हेही वाचा -  सिंधुदुर्ग संवेदनशील जिल्हा ः दाभाडे -

तिला तिची सासू आजारी असल्याची माहिती शेजाऱ्यांनी मोबाईलवरून कळविल्यावर सून गावी परत आली. तेव्हा ही वृद्धा काही खातपित नव्हती. तिच्याजवळ चौकशी केली असता, तिने घडलेला प्रकार सुनेला सांगितला व सदर संशयित खडी मशिनच्या रस्त्याने निघून गेल्याचेही सुनेला सांगितले. सुनेने सदर घटना गावातील प्रतिष्ठितांना सांगितला. त्यानंतर या वृद्धेला खासगी डॉक्‍टरांकडे उपचारासाठी नेण्यात आले होते. तेथे त्यांना तपासून औषधे देण्यात आली.

त्यानंतर गावातील काहींनी जवळच असलेल्या एका क्रशरवरील कर्मचाऱ्यांचे मोबाईलमध्ये फोटो काढून आणले होते. ते या वृद्धेला दाखविण्यात आले. या वृद्धेने तिच्यावर अत्याचार केलेल्या व्यक्‍तीचा त्यातील फोटो ओळखला. या व्यक्‍तीची माहिती घेतली असता तो सोहन अमरचंद भिल, (रा. सालेर, पो. घंगरार, जि. चितोडगड, राजस्थान) येथील असल्याचे समजले. 

संतापजनक

दरम्यान,  शुक्रवारी (८) रोजी दापोली पोलिस ठाण्यात या वृद्धेच्या सुनेने संशयित सोहन भिल याच्याविरोधात तक्रार दाखल केली असून या तक्रारीनुसार संशयिताविरोधात गुन्हा दाखल केला असून त्याला अटक केली आहे. या घटनेमुळे दापोली तालुक्‍यात संताप व्यक्‍त केला आहे.

हेही वाचा - आराम बसमधील तंबाखुजन्य वस्तू जप्त -

संपादन - स्नेहल कदम