सिंधुदुर्गात `येथे` हत्तीने दोन वेळा दिला `हा` इशारा

साटेली भेडशी ( सिंधुदुर्ग ) - केर भेकुर्ली रस्त्यावर गावकऱ्यांनी टस्कराचा थरार अनुभवला. दिवसा राजेशाही थाटात रस्त्यावरून ऐटीत फेरफटका मारणारा टस्कर रात्री मात्र आक्रमक झाला. त्याला पिटाळण्यासाठी मागून गेलेल्या गावकऱ्यांना त्याने दोन वेळा चित्कार करीत 'चले जाव'चा इशारा दिला. एरवी गलका करत त्याच्यामागून धावणाऱ्या गावकऱ्यांची त्याचा हटके पवित्रा बघून मात्र पाचावर धारण बसली. 

गेल्या अठरा एकोणीस वर्षात दोडामार्ग तालुक्‍यातील बहुतांश गावांनी हत्तींचा वावर अनुभवला आहे. काहींना जवळून तर काहींना दुरून त्यांचे दर्शन झाले असले तरी इतक्‍या वर्षांनंतरही हत्तीबद्दलचे अप्रूप कायम आहे. दुसरीकडे आता हत्तींनाही माणसांची सवय झाली आहे. सुरवातीच्या काळात हत्तींचा वावर जंगल भागातच असायचा.

रात्रीच्यावेळी ते शेती बागायतीत घुसून नुकसान करायचे. आता त्यांना स्थळकाळाचे बंधन लागत नाही. कधीही आणि कुठेही ते आता स्वैरपणे संचार करू लागलेत. कधी त्यांनी भीतीपोटी पाठ धरल्याने तर कधी माणसाने भीतीपोटी पळ काढल्याच्या घटना घडल्या आहेत. यात काहीजण जखमीही झाले आहेत. 

केर भेकुर्ली रस्त्यावर सरपंच मिनल देसाई यांचे पती मोहन यांनी भरदिवसा टस्कराचा थरार अनुभवला. ते चार चाकी गाडीतून जात असताना त्यांच्यासमोर रस्त्यावरच आला. त्याला पाहून त्यांच्यासह सोबतच्या माणसांची भंबेरी उडाली. काहींनी त्याचे फोटो आणि व्हिडिओही काढले. त्यावेळी टस्कराचा मूड मात्र प्रसन्न होता; पण सायंकाळी मात्र तो बदलला. त्याच रस्त्यावर तो फेरफटका मारत असताना दुचाकी व चारचाकीने गेलेल्या गावकऱ्यांना तो दिसला.

काहींनी त्याला हुसकावण्याचा प्रयत्न केला; पण आज त्या सगळया भागावर त्याचे राज्य होते. त्याने सोंड हवेत उंचावून मोठ्याने चित्कार केला आणि आक्रमणाचा पवित्रा घेतला. त्याचा तो पवित्रा बघून त्या सर्वांचे धाबे दणाणले आणि पळापळ झाली. केर, भेकुर्ली, मोर्ले, वीजघर, बांबर्डे परिसरात अलिकडे हत्तींचा असा वावर सुरु आहे. त्यातून त्याची एक वेगळीच दहशत तिथल्या माणसामाणसावर आहे. 

हत्ती सांभाळणे सर्वांची जबाबदारी 
हत्ती आणि मानव यांच्यातील वर्षानुवर्षे सुरु असलेला संघर्ष अधूनमधून नवनव्या वळणावर आणि नवनव्या स्वरूपात पाहायला मिळतो आहे. असे असले तरी हत्ती महाराष्ट्राचे वैभव आहे. त्याचा सांभाळ करणे ही आपली जबाबदारी आहे हे विसरून चालणार नाही.