'या' काकांनी केले कातळ जमीनीचे सोने....कसे ते वाचा...

 गुहागर (रत्नागिरी ): वेळणेश्‍वरमधील गाडगीळ काकांनी अर्धा गुंठा कातळावर यावर्षी 40 किलो आले पिकविले. गेल्या वर्षी याच कातळावर 100 किलो हळद लागवडीचा प्रयोग त्यांनी यशस्वी केला होता. वर्षभरातील पालापाचोळा पसरवून त्यामध्ये शेणखत, गांडूळ खत, जीवामृत आणि अमृतपाणी वापरून गाडगीळ कातळावर शेतीचे प्रयोग यशस्वी करत आहेत. शेखर गाडगीळ हे कॉलेज ऑफ इंजिनिअरिंग, पुणे येथे विभागप्रमुख म्हणून निवृत्त झाले. ग्रामीण भागाच्या विकासासाठी काम करण्याची त्यांची इच्छा होती.

हेही वाचा- विमा कंपनीची ही चूक पडली शेतकऱ्यांना भारी ; झाले कोटयावधींचे नुकसान

म्हणून ते वेळणेश्‍वरला सातत्याने येऊ लागले. वेळणेश्‍वरमधील दोन वाड्यांमध्ये रेन हार्वेस्टिंगचे काम केले. याच दरम्यान त्यांनी कातळ जमीन खरेदी केली. तेथेही रेन हार्वेस्टिंगमधून 13 लाख लिटर पाण्याचा संचय ते करत आहेत. कोकणातील विहिरी मे महिन्यात आटतात. म्हणून दोन कप्प्यांची रचना विहिरीत करून त्यामध्ये पावसाचे पाणी साठविण्याचा प्रयोग त्यांनी यशस्वी केला. गाडगीळ यांनी स्वखर्चाने काही ठिकाणी सौरदिवे दिले. गेली चार वर्षे कातळावर पालापाचोळा टाकून त्यात कृषी उत्पन्न मिळते का, असा प्रयोग ते करू लागले. पालापाचोळ्यात शेणखत, गांडूळ खत टाकले. जीवामृत, अमृतपाणी शिंपले. गेल्या वर्षी 200 रोपे लावून अर्ध्या गुंठयात 100 किलो ओल्या हळदीचे व 25 किलो कंदाचे उत्पादन घेतले. यावर्षी आल्याची लागवड केली. 

हेही वाचा- मुख्यमंत्री सिंधुदुर्गला कोणती देणार भेट ...? वाचा....

नियमितपणे जीवामृतचा डोस 
बाजारात उपलब्ध असलेले आले त्यांनी घेतले. 1.5 किलो आल्यापासून रोपे तयार केली. जूनच्या दुसऱ्या आठवड्यात कातळावरील पालापाचोळ्याच्या थरावर लागवड केली. गांडूळ खताचा वापर केला. नियमितपणे जीवामृतचा डोस दिला. यावर्षी नोव्हेंबरपर्यंत पाणी द्यावे लागले नाही; मात्र डिसेंबर, जानेवारी महिन्यात पाणी शिंपले. फेब्रुवारीच्या पहिल्या आठवड्यात काढणी केली असता 40 किलो आल्याचे उत्पादन झाले. हळदीनंतर कातळावरील हा प्रयोगही सफल झाला आहे.