कोकण : दोनशे वर्षे परंपरेची सोळजाई देवीची यात्रा यंदा रद्द

साडवली (रत्नागिरी) : सुमारे दोनशे वर्षाची परंपरा असलेली देवरुख सोळजाई देवीची देवदिवाळीची होणारी लोटांगण यात्रा यंदा कोरोनामुळे रद्द करण्यात आली आहे. पत्रकार परिषदेत अध्यक्ष बापु गांधी यांनी ही माहीती दिली.

देवरुखची ग्रामदेवता श्री देवी सोळजाई देवस्थानची लोटांगण यात्रा प्रसिद्ध आहे. नवस बोललेले भाविक नवस पुर्ण करण्यासाठी देवी समोर लोटांगण घालतात. मंदिरभोवती पाच फेर्‍या पुर्ण करुन लोटांगणे घातली जातात. यावेळी प्रमुख शहरातील नागरीक उपस्थित रहातात. यावेळी जत्रेचे स्वरुप येते व मोठी यात्रा भरते. यावर्षी १५ डिसेंबरला होणारी ही लोटांगण यात्रा रद्द करण्यात आली आहे.

हेही वाचा - दुर्दैव! सहा वर्षानंतर परत तेच घडलं ; बापासारखचं मरण पोराच्या नशीबी आलं -

दोनशे वर्षाच्या परंपरेत वादळ, पाऊस असुनही यात्रेत खंड पडला नव्हता. यंदा कोरोनामुळे ही प्रथा बंद पडली आहे. धार्मिक विधी होवून लांबूनच देवीचे दर्शन घेण्याची सुविधा देण्यात येणार आहे. बाहेर कुठलीही दुकाने लागणार नाहीत. भाविकांनी शक्यतो गर्दी करु नये असे आवाहन गांधी यांनी केले आहे.
सोळजाई देवी ही ४४ खेडी व १६ गावांची मालकीण असल्याचे मानले जाते. आंबा, प्रभानवल्ली, उक्षी, गोठणे, सावर्डे असा परीसर देवीच्या अखत्यारीत येतो. नवसाला पावणारी देवी म्हणून सोळजाईची या परिसरात प्रसिद्ध आहे. पत्रकार परिषदेला देवस्थानचे अध्यक्ष बापु गांधी, संतोष लाड, रविंद्र गीते, प्रकाश शिंदे, उपस्थित होते.

संपादन - स्नेहल कदम