तुझ्यावर मी खरे प्रेम करत नाही, असं तो म्हणाला अन् तिने उचलेले धक्कादायक पाऊल

दाभोळ (रत्नागिरी) : लग्नाचे आमिष दाखवून वारंवार शरीरसबंध ठेवत अखेर लग्नाला नकार दिल्याने पीडित तरुणीने फिनेल प्राशन करून आत्महत्या करण्याचा प्रयत्न केला. या प्रकरणी संशयित तरुणावर दापोली पोलिस ठाण्यात गुन्हा दाखल करण्यात आला असून संशयिताला दापोली पोलिसांनी अटक केली. दिनेश सुनील इंदुलकर असे अटक केलेल्या तरुणाचे नाव आहे. 

पोलिसानी संशयिताला न्यायालयासमोर हजर केले असता न्यायालयाने त्याला १४ दिवसांची न्यायालयीन कोठडी सुनावली आहे. याबाबत दापोली पोलिसांनी दिलेल्या माहितीनुसार, या प्रकरणातील पीडित तरुणी व संशयित यांची दीड वर्षापूर्वी मैत्री झाली होती. यानंतर व्हॉट्‌स ॲपच्या माध्यमातून व भेटून ते एकमेकांशी संपर्क साधत होते. जून महिन्यातील एका दिवशी पीडित तरुणी कामावरून घरी येत असता तिला संशयित तरुणाने रात्री आठ वाजण्याच्या सुमारास थांबवून तिच्या हातातील मोबाईल हिसकावून घेतला. त्याने तिला पाठवलेले सर्व मेसेज डिलीट करून टाकले व तुझ्यावर मी खरे प्रेम करत नाही असे सांगितले.

हेही वाचा - जा बाबा! तुझ्या पाया पडतो! माजी सरपंचानी केली विनवणी -

हा सर्व प्रकार या तरुणीने आपल्या भावाला व वडिलांना सांगितला. त्यानंतर २७ नोव्हेंबरला ११ वाजता बुरोंडी येथे संशयित दिनेश सुनील इंदुलकर याच्या व या तरुणीच्या समाजातील लोकांची बैठक पार पडली. त्यात संशयित दिनेश याने या मुलीशी आपल्याला लग्न करायचे आहे की नाही ते चार दिवसात सांगतो, असे सांगितले. त्यानंतर २९ नोव्हेंबरला सकाळी ११ वाजण्याच्या सुमारास पुन्हा एकदा मीटिंग घेण्यात आली व यामध्ये संशयित दिनेशने आपण या मुलीशी लग्न करणार नाही, असे सांगितले. 

या गोष्टीचा धसका या तरुणीने घेऊन रागाच्या भरात ३० नोव्हेंबरला सकाळी ७ वाजण्याच्या सुमारास घरातील फिनेल प्राशन केले. त्याचा त्रास तिला झाल्याने अखेर तिला उपचारासाठी दापोली उपजिल्हा रुग्णालयात दाखल करण्यात आले. तिची प्रकृती आता स्थिर असल्याचे सांगण्यात आले आहे. या तरुणीच्या तक्रारीनुसार संशयित दिनेश इंदुलकर याच्याविरोधात गुन्हा दाखल करण्यात आला. त्याला दापोली पोलिसांनी अटक करून न्यायालयात हजर केले होते. या घटनेचा अधिक तपास सहाय्यक पोलिस निरीक्षक पूजा हिरेमठ करीत आहेत.

हेही वाचा - नैसर्गिक वाळूला पर्याय क्रश-वॉश सॅंड; दररोज चारशेंवर ब्रासची आवक

संपादन - स्नेहल कदम