जिल्ह्यातील वाहनचालकांना गोवा ‘आरटीओ’कडून भुर्दंड

87506

जिल्ह्यातील वाहनचालकांना
गोवा ‘आरटीओ’कडून भुर्दंड

राजन तेली ः डॉ. सावंतांचे वेधले लक्ष

सकाळ वृत्तसेवा
सावंतवाडी, ता. ३ ः गोव्यात परमिटच्या गाड्या चालवून आपला उदरनिर्वाह करणाऱ्या सिंधुदुर्ग जिल्ह्यातील वाहन चालकांवर गोवा आर.टी.ओ.कडून दंडाचा भुर्दंड आकारला जात आहे. त्यामुळे सिंधुदुर्ग जिल्ह्यातील वाहनचालकांना योग्य तो दिलासा मिळावा, अशी मागणी माजी आमदार राजन तेली यांनी गोव्याचे मुख्यमंत्री डॉ. प्रमोद सावंत यांच्याकडे केली. यावेळी सर्वेश तेली उपस्थित होते.
सिंधुदुर्ग जिल्ह्यातील शेकडो बेरोजगार तरुण-नोकरी नोकरीनिमित्त जवळच्या गोवा राज्यावर अवलंबून आहेत. विशेषतःअनेक वाहनचालक गोव्यात परमिटच्या गाड्या चालवून आपला उदरनिर्वाह करत आहेत; मात्र, त्यांचे वाहन परवाने एमएच ०७ (सिंधुदुर्ग जिल्हा) असल्याने गोवा आर.टी.ओ.कडून नाहक दंड आकारला जात आहे. त्यामुळे या वाहनचालकांना आर्थिक भुर्दंड सोसावा लागत आहे. गेले कित्येक महिने हा प्रकार सुरू आहे. त्यामुळे सिंधुदुर्गातील वाहनचालकांतून नाराजी व्यक्त केली जात आहे. ही नाराजी लक्षात घेत माजी आमदार तेली यांनी यासंदर्भात गोव्याचे मुख्यमंत्री प्रमोद सावंत यांची भेट घेत या विषयावर चर्चा केली. शिवाय अशा वाहनचालकांवर होणारी कारवाई थांबवून त्यांना दिलासा द्यावा, अशी मागणी केली. यावर योग्य तो उपाय काढावा, असेही सांगितले. दुसरीकडे आरोग्यवस्था आणि त्या संदर्भात असलेल्या समस्यांवरही त्यांनी चर्चा केली. या संदर्भातील रुग्णांना गोव्यातील योग्य व्यवस्थेबाबत येणाऱ्या अडचणी दूर करण्याचेही तेली यांनी सुचविले. मोपा विमानतळावर नवीन जागांसाठी भरती होणार आहे. त्यामध्ये जास्तीत जास्त सिंधुदुर्गातील युवकांना संधी देण्यात यावी, असेही तेली यांनी सांगितले.