मत्स्यखवय्यांचा आनंद शिगेला! श्रावण संपताच मासळीची बंपर कॅच

प्रशांत हिंदळेकर
Thursday, 20 August 2020

पर्ससीन, हायस्पीड ट्रॉलर्सची घुसखोरी, एलईडीची विध्वंसकारी मासेमारीमुळे स्थानिक मच्छीमारांच्या जाळ्यात मासळीच मिळत नव्हती.

मालवण (सिंधुदुर्ग) - येथील किनारपट्टी भागात गेले दोन दिवस मोरी मासळीची चांगली बंपर कॅच मिळाली. श्रावण संपल्याने मोरी मासळीच्या खरेदीसाठी मत्स्यखवय्यांनी आज समुद्रकिनारी मोठी गर्दी केल्याचे दिसून आले. सकाळच्या सत्रात 250 रुपये किलो मोरीचा दर 300 रुपयांपर्यंत वधारला होता. 
गतवर्षीच्या मासेमारी हंगामात म्हणावी तशी मासळीची पकड मिळाली नाही. त्यामुळे मच्छीमारांवर उपासमारीची वेळ आली.

पर्ससीन, हायस्पीड ट्रॉलर्सची घुसखोरी, एलईडीची विध्वंसकारी मासेमारीमुळे स्थानिक मच्छीमारांच्या जाळ्यात मासळीच मिळत नव्हती. कोरोनाच्या संकटाचा फटका मासेमारी हंगामास बसल्याचे दिसून आले. कोरोनामुळे आर्थिक घडी बिघडल्याने मच्छीमारांच्या चिंतेत आणखीनच वाढ झाल्याचे दिसून आले. नव्या मासेमारी हंगामाची दमदार सुरवात होईल, अशी अपेक्षा मच्छीमार बाळगून होते.

1 ऑगस्टपासून मासेमारी हंगामास सुरवात झाली; मात्र वादळी वारे, अतिवृष्टीमुळे मासेमारीस सुरवात झाली नाही. मात्र गेल्या काही दिवसात स्थानिक मच्छीमारांना बांगडा, पेडवे, पापलेट, मोरी यासारखी किरकोळ मासळीचे उत्पन्न मिळत होते. त्यामुळे गणेशोत्सवापूर्वी मासळीची चांगली कॅच मिळेल अशी मच्छीमारांना आशा होती. यातच गेल्या दोन दिवसात मच्छीमारांना मोरी मासळीची मोठी कॅच मिळाल्याने त्यांच्यात समाधानाचे वातावरण आहे. मोरीची आवक वाढल्याने 500 ते 550 रुपये किलो दराने मिळणाऱ्या मोरीच्या दरात घसरण झाल्याचे दिसून आले. 

श्रावण संपल्याने... 
श्रावण संपल्याने येत्या गणेशोत्सवापूर्वी मासळीचा आस्वाद लुटण्यासाठी मत्स्यखवय्यांनी आज समुद्रकिनारी गर्दी केल्याचे दिसून आले. सकाळी 250 रुपये किलो मोरीचा दर 300 रुपये किलोपर्यंत वधारल्याचे दिसून आले. सध्या पर्यटन व्यवसाय बंद असल्याने मासळीची मागणी म्हणावी तशी नाही. त्यामुळे दरात मोठी घसरण झाल्याचे दिसून आले. मासळीची चांगली कॅच मिळाल्याने मच्छीमारांमध्ये समाधानाचे वातावरण असल्याचे दिसून आले. 

संपादन - राहुल पाटील


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Good fish found in Malvan konkan sindhudurg