अर्ज भरण्यासाठी देवरूखात गर्दी: ४४ ग्रामपंचायतींमधून एकूण १९८ अर्ज दाखल

देवरुख (रत्नागिरी) :  ग्रामपंचायतीच्या सार्वत्रिक निवडणुकीसाठी अर्ज भरण्याचे शेवटचे तीन दिवस बाकी असताना अर्ज दाखल करण्याकरता देवरुख तहसील कार्यालयासमोर एकच गर्दी झाल्याचे दिसून आले. पोलिस मैदानावर चारचाकी वाहनांची गर्दी पाहायला मिळाली. सोमवारी ४४ ग्रामपंचायतींमधून एकूण १९८ अर्ज दाखल झाले. 

१५ जानेवारी रोजी होवू घातलेल्या ग्रामपंचायतीच्या सार्वत्रिक निवडणुकीसाठी आवश्‍यक असणारी कागदपत्रे मिळविण्यासाठी संगमेश्‍वर तालुक्‍यातील इच्छुकांची सध्या धावपळ सुरु आहे. महा-ई सेवा केंद्र, सेतू कार्यालय आणि आनलाईन अर्ज भरुन देणारे सेंटरमध्ये गर्दी करत आहेत. सध्या आनलाईन केंद्राचे काम मात्र जोरात सुरू आहे. ३० तारखेपर्यंत अर्ज भरण्याची मुदत आहे. आता फक्‍त दोनच दिवस उरल्यामुळे इच्छुक उमेदवारांची एकच घाई होत आहे. तालुक्‍यातील ८१ गामपंचायतीची सार्वत्रिक निवडणुक होत आहे. ग्रामपंचायती आपल्याच ताब्यात कशा राहतील, यासाठी सर्वच राजकीय पक्ष कंबर कसताना दिसत आहेत. 

मंगळवार व बुधवार हे अर्ज भरण्याचे शेवटचे दिवस आल्याने या दोन दिवशी अधिकच गर्दी होईल, अशी अपेक्षा आहे. आता ८१ ग्रामपंचायतीपैकी किती ग्रामपंचायतींवर गावपॅनलचा झेंडा फडकणार हे काही दिवसांमध्ये स्पष्ट होणार आहे. निवडणूक प्रक्रिया सुरु झाल्यापासून २४ रोजी ५ ग्रापंचायतीमधून १३ अर्ज दाखल झाले होते. त्यानंतर सोमवारी ४४ ग्रामपंचायतीमधून १९८ एवढे अर्ज दाखल झाले. आजपर्यंत एकुण २११ अर्ज दाखल झाले आहेत. अर्ज भरण्याकरिता शेवटचे दोन दिवस बाकी असल्याने गर्दी होणार हे गृहित धरुन तहसील प्रशासनाने सेतू कार्यालयाचा वेळ वाढवून दिल्यामुळे तालुक्‍यातून समाधान व्यक्‍त होत आहे.

संपादन- अर्चना बनगे