चाैपदरीकरणाने अनेकांच्या रोजगाराला भरणेत ब्रेक ! 

मुझफ्फर खान
सोमवार, 13 मे 2019

कोकण विकासाला वेग देणाऱ्या मुंबई-गोवा महामार्ग चौपदरीकरण अखेर सुरू झाले. सध्या रत्नागिरी-सिंधुदुर्ग जिल्ह्यात महामार्गालगत भग्न घरे, अवशेष उरलेले दुकानगाळे, सपाट झालेल्या व्यवसायाच्या जागा, मोडतोडीतच गिऱ्हाईकाची वाट बघत असलेले छोटे दुकानदार आणि वर्षांनुवर्षे मूळं रूजलेल्या ठिकाणाहून स्थलांतर करण्यास भाग पडलेल्या शेकडो रहिवाशांच्या डोळ्यातील भविष्याची काळजी पहायला मिळत आहे. उद्धवस्त घरे, उद्धवस्त मने, उजाडलेल्या शाळा, उजाड झालेली वस्ती, मोडतोडीमुळे निसर्गाच्या आणि मानवी वस्तीच्या हरवलेल्या खुणा शोधत असलेले रहिवासी हे वास्तव कोकणात या महामार्गालगत पावलापावलांवर पहायला मिळत आहे. काय आहे नेमकी परिस्थिती? कामाची सध्याची परिस्थिती काय? कधी होणार हे काम? याचा आमच्या बातमीदारांनी जागेवर जाऊन केलेला "ग्राऊंड रिपोर्ट' आजपासून. 

चिपळूण -  खेड तालुक्‍यातील भरणे व भरणेनाका येथील बाजारपेठ नेहमी गजबजलेली असे. येथे गरमगरम वडापाव, भजी, पालेभाजी, सरबत, सुकी मच्छी हातगाडीवर मिळायच्या. मुंबई - गोवा राष्ट्रीय महामार्गाच्या चौपदरीकरणासाठी येथील बाजारपेठ सहा महिन्यापूर्वी उठविण्यात आली; मात्र अद्याप चौपदरीकरणाच्या कामाला सुरवात झालेली नाही. त्यामुळे सव्वाशेहून अधिक जणांचा रोजगार हिरावला आहे. दैनंदिन उलाढाल ठप्प झाल्यामुळे आर्थिक घडी विस्कटली आहे. 

मुंबईतून रत्नागिरी जिल्ह्यात येणारा प्रवासी भरणेनाका येथे हमखास थांबतो. येथील टपरीवरचा चहा घेवून थकवा घालवून तो पुन्हा प्रवासाला लागतो. घरगुती सर्व प्रकारच्या वस्तू येथे उपलब्ध होतात. सामान्य लोकाची बाजारपेठ म्हणून भरणेनाक्‍याची ओळख आहे. भरणेनाका येथे रस्त्याच्या दुतर्फा छोटी मोठी दुकाने होती. दहा बाय दहाच्या गाळ्यात मेडीकल, बेकरी, कपड्याची दुकाने वसली होती. रस्त्यालगत हातगाड्या आणि पानटपऱ्या होत्या.

येथे हातगाडीवर आणि भाड्याच्या गाळ्यात किरकोळ वस्तू विकणारे दररोज पाचशे ते हजार रुपयाचा व्यवसाय करून कुटुंब चालवत होते. मुंबई - गोवा राष्ट्रीय महामार्गाच्या चौपदीकरणासाठी येथील दुकानदारांना दिवाळीत नोटीसा काढण्यात आल्या. अतिक्रमण तातडीने काढण्याची सूचना झाल्यामुळे पंधरा दिवसात सर्वांनी स्वखुशीने अतिक्रमण हटविले; मात्र सहा महिने झाले तरी चौपदरीकरणाचे काम सुरू न झाल्यामुळे येथील व्यापाऱ्यांमध्ये नाराजी आहे. येथील 90 टक्के व्यवहार सहा महिन्यापासून बंद आहे. एप्रिल व मे महिन्यात शिमगोत्सव, यात्रा आणि सुट्टीनिमित्त लाखो पर्यटक व चाकरमानी महामार्गाने जिल्ह्यात येतात. त्यामुळे हे दोन महिने येथील दुकानदारांसाठी सुगीचे असतात. चौपदरीकरणामुळे यावर्षीचा त्यांचा हंगाम वाया गेला आहे. 

रोज गोळा व्हायची 80 हजारांची पिग्मी 
सहकारी बॅंका व पतसंस्थांच्या प्रतिनिधींना किरकोळ दुकानदार 100 रुपयांपासून 500 रुपयापर्यंत दररोज पिग्मी द्यायचे. यातून सुमारे 70 ते 80 हजार रुपये दररोज गोळा व्हायचे. ही उलाढाल आता ठप्प झाली आहे. 

भरणे नाक्‍यात एक - दोन चहाच्या टपऱ्या सुरू आहेत. पण प्रवाशांना उन्हात उभे राहून चहा प्यावा लागतो. खाद्यपदार्थांवर धूळ उडत असल्यामुळे दुकानदार खाद्यपदार्थ झाकून ठेवतात. मात्र येथे काही मिळणार नाही, असा समज करून प्रवासी पुढे निघून जातात. शासनाने लवकरात लवकर महामार्गाचे काम सुरू करून ते पूर्ण करावे म्हणजे आम्हाला आमचा व्यवसाय मांडता येईल. 
- मनिषा शेलार,
भरणेनाका खेड 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: issue of Mumbai - Goa four track highway