Kankavali : कणकवलीत मुसळधार; अवकाळीची झोड; कमी दाबाच्या पट्ट्याचा परिणाम

वैभववाडीः विजांच्या कडकडाटांसह आज दुपारी वैभववाडी आणि कणकवली तालुक्याच्या अनेक भागाला अवकाळी पावसाने झोडपून काढले. काही भागांत मुसळधार पाऊस झाला. यावर्षी प्रथम शेतमळ्यांमध्ये पाणी साचले होते. पावसामुळे पूर्वपट्ट्यातील आंबापीक धोक्यात आले आहे.

पूर्व मध्य अरबी समुद्रापासून सौराष्ट्रापर्यंत हवेच्या कमी दाबाचा पट्टा निर्माण झाल्यामुळे गेले काही दिवस राज्यभरात अवकाळी पाऊस पडत आहे. जिल्ह्यात देखील मागील तीन-चार दिवसांपासून सरी कोसळत आहेत. आज सकाळपासून जिल्ह्यात सर्वत्र ढगाळ वातावरण होते. त्यामुळे प्रचंड उकाडा होता. दुपारी दीड-दोनपासून वैभववाडी तालुक्यातील डोंगरपायथ्याच्या गावांमध्ये विजांचा लखलखाट सुरू झाला. त्यानंतर या भागात जोरदार पावसाला सुरुवात झाली.

वैभववाडी तालुक्यातील करूळ, नावळे, सडुरे, शिराळे, कुर्ली, घोणसरी, भुईबावडा, फोंडा, लोरे, खांबाळे, आर्चिणे, कनेडी, नाटळ, हरकुळ या गावांना मुसळधार पावसाने अक्षरक्षः झोडपून काढले. अनेक भागांत तासभर मुसळधार पाऊस झाला. त्यामुळे शेतमळ्यांमध्ये प्रथमच पावसाचे पाणी साचल्याचे चित्र पाहायला मिळाले. काही नाल्यांमधून देखील पावसाचे वाहत होते. कोंडये, डामरे, नवीन कुर्ली वसाहत या भागात हलक्या सरी झाल्या. जिल्ह्यातील कुडाळ, सावंतवाडी, दोडामार्ग तालुक्यात देखील पावसाचे वातावरण होते. या पावसामुळे पूर्वपट्ट्यातील आंबा हंगाम संपुष्टात येण्याची चिन्हे निर्माण झाली आहेत. या भागात केवळ आठ ते दहा दिवसांचा हंगाम राहिला आहे. त्यामुळे २० मेपर्यंत आंबा हंगाम चालण्याचा अंदाज होता; मात्र, पावसामुळे या हंगामपुढे प्रश्नचिन्ह निर्माण झाले आहे.

मॉन्सून ३ ते ४ जूनला जिल्ह्यात

अंदमान समुद्रात उद्या (ता. १३) मॉन्सून दाखल होण्यासाठी पोषक स्थिती तयार झाली आहे. त्यानंतर दरवर्षीच्या तुलनेत दोन ते तीन दिवस अगोदर म्हणजेच २७ मे रोजी मॉन्सून केरळात दाखल होण्याचा अंदाज हवामान विभागाने दिला आहे. त्यामुळे सिंधुदुर्गात देखील ३ ते ४ जूनपर्यंत मॉन्सून दाखल होण्याचा अंदाज आहे. सिंधुदुर्गात साधारणपणे सध्या ६ किंवा ७ जूनपर्यंत मॉन्सून दाखल होतो. मात्र, गेल्या दोन तीन वर्षांत मॉन्सूनने चकवा दिला होता.