कोकणातील ‘सावडाव’ धबधबा प्रवाहित मात्र पर्यटकांअभावी सुनाच!

नांदगाव : कणकवली (kankavli) तालुक्यातील मुंबई-गोवा महामार्गालगत (mumbai-goa highway) असणारे निसर्गरम्य वर्षा पर्यटनस्थळ म्हणजे सावडाव धबधबा. (sawdav waterfall) गेली काही दिवस मॉन्सूनने दमदार हजेरी लावल्याने सावडाव धबधबा प्रवाहित झाला आहे. वर्षा पर्यटनासाठी तो आकर्षित करत आहे; मात्र कोरोनाचे संकट (covid-19) असल्यामुळे यंदाही वर्षा पर्यटनाला (rain tourism) हौशी पर्यटक मुकले आहेत. व्यवसायच ठप्प असल्याने सध्या धबधबा परिसरात धबधब्याच्या पाण्याचा अन् पक्षांचा किलबिलाटच ऐकू येतो.

पश्चिम महाराष्ट्र, गोवा, कनार्टकसह महाष्ट्रातील अनेक पर्यटकांना भुरळ घालणारा सावडाव धबधबा आहे. दरवर्षी हजारो पर्यटक या पर्यटनस्थळाला भेट देतात. स्थानिक प्रशासनाने पर्यटन बंद केल्याने परिसर सुन्न झाला आहे. कोरोनामुळे दरवर्षी गर्दी करणारे वर्षा पर्यटक दिसत नसल्याने कमालीची शांतता आहे. पर्यटक नसल्याने येथील व्यावसायिकांचा रोजगार बंद झाला असून ग्रामपंचायतीला मिळणाऱ्या अभ्यंगत करातील उत्पन्नात घट झाली.

सावडाव धबधबा पर्यटनस्थळ म्हणून विकसित झाल्यावर अनेक सुविधा धबधबा परिसरात निर्माण झाल्या आहेत. शांत शितल व सुरक्षित धबधबा म्हणून ओळख असलेल्या धबधबा परिसरात दरवर्षी चिमुकल्यांसह अबालवृद्धांपर्यंत सर्वच जण येथे हजेरी लावायचे. कोरोनाचे सावट लक्षात घेता येथील पर्यटन बंद केल्याचे सरपंच अजय कदम, उपसरपंच दत्ता काटे, ग्रामसेवक शशिकांत तांबे यांनी सांगितले.

"सावडाव धबधब्याच्या ठिकाणी हॉटेलचा व्यवसाय होता. मोठ्या संख्येने पर्यटक येत होते. यामुळे रोजगार मिळत होता. कोरोनामुळे धबधबा बंद असल्याने पर्यटक येत नाहीत. व्यवसाय बंद असल्याने उपासमार होत आहे. व्यावसायिकांना शासनाने मदत करावी."

- आनंद वासुदेव नरसाळे, हॉटेल व्यावसायिक, सावडाव धबधबा