खारेपाटणला महामार्गालगतची कामे अपूर्ण

खारेपाटण : मुंबई - गोवा राष्ट्रीय महामार्ग चौपदरीकरण पूर्ण झाले असले तरी अनेक कामे अपूर्ण आहेत. महामार्ग प्राधिकरण याकडे दुर्लक्ष करत असल्याने प्रशासनाचे लक्ष वेधण्यासाठी खारेपाटण ग्रामपंचायत व ग्रामस्थांच्यावतीने १४ फेब्रुवारी रोजी खारेपाटण येथील महामार्ग प्राधिकरण कार्यालयाच्या समोर आंदोलन करण्यात येणार आहे, असा इशारा खारेपाटण सरपंच रमाकांत राऊत यांनी दिला आहे.

खारेपाटण येथील महामार्ग प्राधिकरण उपविभाग कार्यालयातील सहायक अभियंता बी. जी. कुमावत यांना तसे निवेदन देण्यात आले.यावेळी खारेपाटण सरपंच रमाकांत राऊत, उपसरपंच इस्माईल मुकादम, ग्रामपंचायत सदस्य महेंद्र गुरव, योगेश पाटणकर,उज्वला चिके, रीना ब्रम्हदंडे, सोनल लोकरे,आरती कर्ले आदी उपस्थित होते.

खारेपाटण शहरातून मुंबई - गोवा हा राष्ट्रीय महामार्ग जात आहे. या महामार्गावर खारेपाटणमधील काही ठिकाणी बसथांबे बांधलेले नाहीत. खारेपाटण बॉक्सवेल येथील दोन्ही बाजूकडील सेवारस्त्यावर वाहन चालकासाठी बसविलेले बर्हिवक्र आरसे हे लहान आहेत. त्यामुळे अपघाताची शक्यता आहे. येथे मोठे आरसे बसविणे गरजेचे आहे. तसेच खारेपाटण महामार्गावरून ग्रामपंचायत कार्यालयाकडे जाणारा रस्ता खोदकामानंतर बनवून देण्यात येणार होता. तसेच रस्ता सुरक्षेच्या दृष्टीने रोलिंग लावण्यात येणार होते. ही दोन्ही कामे सध्या अपूर्ण आहेत. तसेच खारेपाटण बॉक्सवेलच्या बाजूने बांधलेली गटारे ही अर्धवट आहेत. रामेश्वरनगर खारेपाटण येथील मुख्य रस्त्यावर प्राथमिक आरोग्‍य केंद्राकडे गेलेला जुना हायवे रस्त्यावर मोठा खड्डा पडला असून त्याचा येथील नागरिकांना त्रास होत आहे.

इतर काही मागण्या

खारेपाटण येथे महामार्गावर बऱ्याच ठिकाणी दिशादर्शक फलक तसेच अपघात ठिकाणे दर्शविणारे फलक नाहीत. हायमास्ट दिवे अद्याप चालू नाहीत यामुळे या परिसरात सर्वत्र काळोख असतो. तसेच महामार्गावरून खारेपाटणला दोन्ही बाजूने जोडणाऱ्या सेवारस्त्याची कामे अपूर्ण असून खारेपाटण संभाजीनगर व खारेपाटण येथून चिंचवलीकडे जाणाऱ्या सेवा रस्त्याच्या कामाबाबतही संबंधितांचे लक्ष वेधण्याचे निवेदनात नमूद आहे.