'सुप्रिया सुळे आत्ताच सांगतो...' सोमय्यांची दापोलीतून राष्ट्रवादीवर तोफ

अनिल परब यांचे दापोलीतील रिसॉर्ट आपण तोडून दाखवणारच असा विश्वास भाजपचे नेते किरीट सोमय्या यांनी व्यक्त केला आहे. तसेच हे रिसॉर्ट तोडून दाखवणारच असे सांगत तुम्ही ते वाचवून दाखवा असे सोमय्या म्हणाले. सोमय्या यांनी मागील आठवड्यातच त्यांचा दापोलीतील कार्यक्रम जाहीर केला होता. यानुसार ते आज दापोलीत दाखल झाले.

यावेळी सोमय्यांनी शरद पवार आणि सुप्रिया सुळे यांच्यावरही आरोप केले. राष्ट्रवादीच्या काही नेत्यांची नावं घेत पुढच्या आठड्यात तीन नेत्यांवर कारवाई होणार असल्याचं सांगितलं.

एक एक माफियांना जेलमध्ये जावं लागणार आहे. अनिल परब, अजित पवार, हसन मुश्रीफ यांना कोणतं सर्टिफिकेट हवं आहे, हे शरद पवारांनी ठरवावं, असं सोमय्या म्हणाले. मात्र, डर्टी डझन्सवर कारवाई होणार म्हणजे होणार, यावर ठाम असल्याचं सोमय्यांनी सांगितलं. सुप्रिया सुळे म्हणतात, सोमय्यांना कसं कळतं की छापे पडणार आहेत. तर आत्ताच सांगतो, पुढच्या आठवड्यात तीन मंत्र्यांवर छापे पडणार आहेत, असं सोमय्या म्हणाले.

भाजप कार्यकर्ते आणि निलेश राणेंनी सोमय्यांचं जंगी स्वागत केलं. यावेळी सोमय्यांनी परब यांच्यावर आरोप केले. अनिल परब यांचं रिसॉर्ट तोडणार असल्याचं स्पष्ट केलं. त्यांनी उद्धव ठाकरेंना आव्हान देत आम्हाला थांबवून दाखवा, असं म्हटलं. सचिन वाझे, प्रदीप शर्मा आणि खरमाटे यांच्या सारख्या वसुली एजंट्सला आता आम्ही सोडणार नाही, असं ते म्हणाले.