आचरा : कांदळवन तोडीबाबत पारवाडी डोंगरेवाडी ग्रामस्थांच्या मागणीला यश

आचरा : आचरा पारवाडी डोंगरेवाडी येथील कोळंबी प्रकल्पा लगतची कांदळवन तोडीबाबत पंचनाम्यासाठी या अगोदर तारखा देवूनही पुर्ण समिती नसल्याने होऊ न शकलेला पंचनामा नुकताच पुर्ण समितीच्या उपस्थितीत पार पडला. मागील सहा सात महिने कांदळवन तोडीबाबत पारवाडी डोंगरेवाडी ग्रामस्थांच्या मागणीला यश आले.

कुडाळ उपविभागीय अधिकारी वंदना खरमाळे यांच्या उपस्थितीत कांदळवन तोडीबाबत पंचनामे करण्यात आले. यावेळी त्यांच्या सोबत मालवण नायब तहसीलदार आनंद मालवणकर, आचरा पोलीस स्टेशनचे सहाय्यक पोलीस निरीक्षक कुलदीप पाटील, वनक्षेत्रपाल कुडाळ अमृत शिंदे, वनपाल श्रीकृष्ण परीट, वनरक्षक विष्णू नरळे, अनिल परब, आचरा मंडल अधिकारी अजय परब, तलाठी अनिल काळे, कोतवाल गिरीश घाडी तसेच श्री. गोसावी, भूमी अभिलेखचे ओंकार आपटे, पोलीस हवालदार महेश देसाई, अक्षय धेंडे आदी सहभागी झाले होते.

पारवाडी डोंगरेवाडी येथील कोळंबी प्रकल्पा विरोधात एकवटलेल्या ग्रामस्थांनी या प्रकल्पालगतची कांदळवनाची झाडे तोडल्याची शासनाकडे सहा सात महिन्यापुर्वी तक्रार दाखल केली होती. याबाबत उपविभागीय अधिकारी खरमाळे यांच्या अध्यक्षतेखाली गठीत केलेल्या समितीमार्फत या भागाची पहाणी केली गेली. या पहाणीत या भागात कांदळवन तोड झाल्याचे निदर्शनास आल्याने सकाळच्या सत्रात प्रकल्पालगत झालेल्या कांदळवन तोडीचा पंचनामा संयुक्त समितीमार्फत केला गेला; मात्र याबाबत उपस्थित पशुराम शेटये, रवींद्र बागवे, प्रदिप केळकर, चंदू कदम, शिर्के, मुळये, साळकर आदी ग्रामस्थांनी अजूनही काही कांदळवृक्षांची तोड झाल्याचे संयुक्त समितीच्या निदर्शनास आणल्यावर नदीच्या भरतीमुळे पहाणी करणे दुपारच्या सत्रात शक्य झाले नाही.

त्यामुळे सायंकाळी ओहोटीच्या वेळी या भागात जाऊन समिती तर्फे कांदळवन तोडीचा पंचनामा केला गेला. यामुळे ग्रामस्थांमधून समाधान व्यक्त करण्यात आले.