कोकण रेल्वेचे वेळापत्रक कोलमडले

सावंतवाडी - गणेशोत्सवाच्या सलग दुसऱ्या दिवशी देखील कोकण रेल्वे मार्गावरून धावणाऱ्या गाड्यांचे वेळापत्रक कोलमडलेलेच पहायला मिळत आहे.

गर्दीच्या हंगामात कोकण रेल्वेमार्गावर जादा गाड्या सोडल्या जातात. मात्र कोकण रेल्वेच्या रोहा ते ठोकुर मार्गावर एकेरी रेल्वे ट्रॅक असल्यामुळे ट्रेन बंचिंगच्या समस्येला कोकण रेल्वेला सामोरे जावे लागते. विशेष म्हणजे कोकण रेल्वेच्या या एकेरी ट्रॅकवर सध्या दिवसाला सुमारे 90 गाड्या धावत असल्याची माहिती रेल्वे सूत्रांनी दिली आहे.

दरम्यान आजही कोकण रेल्वे मार्गावरील बहुतांश गाड्या उशिराने धावत आहेत.

सकाळच्या गाड्यांमध्ये 10111 डाऊन कोकणकन्या एक्स्प्रेस तब्बल 3 तास उशिराने धावत आहे. 01001 शिवाजी टर्मिनस सावंतवाडी गणपती विशेष 1.30 तास, 01013 शिवाजी टर्मिनस सावंतवाडी विशेष गाडी 1.50 मि., 01037 एलटीटी पेरणम स्पेशल 2.50 मि., 09007 मुंबई सेंट्रल थिविम 1.40 मि., 50101 रत्नागिरी मडगाव पॅसेंजर 2 तास या कमी पल्ल्याच्या गाड्या उशिरा धावत आहेत. 

तर 09002 मेंगलोर मुंबई सेंट्रल स्पेशल तब्बल 4.15 तास, 12202 गरीबरथ एक्स्प्रेस 1 तास, 12617 मंगला एक्स्प्रेस 1.10 मि., 16346 नेत्रावती अर्धातास, 19423 तिरूनवेली गांधीधाम 1.10 मि., 22475 बिकानेर कोइंबतूर एक तासाने या सर्व लांब पल्ल्याच्या गाड्या उशिराने धावत आहेत. 

ट्रेन बंचिंगमुळे सध्या कोकण रेल्वेवरील गाड्या उशिराने धावत असल्या तरी गाड्या वेळेवर धावण्यासाठी रेल्वे प्रशासन प्रयत्नशील आहे. तरी सर्व प्रवाश्यांची कोकण रेल्वेला सहकार्य करण्याचे आवाहन कोकण रेल्वेकडून करण्यात येत आहे.