Children Drown : मुलीला वाचवताना दोन किशोरवयीन मुले नदीत बुडाली

लांजा - दुपारच्या वेळी नदीवर गेलेल्या किशोरवयीन मुलांना नदीपात्रात उडी घेण्याचा मोह आवरला नाही. एका मुलीने नदीपात्रात उडी घेतली. मात्र, तिचा अंदाज चुकला. ती गटांगळ्या खाऊ लागताच जोरजोरात तिच्या आईला हाका मारू लागली. हे पाहून त्यांच्यापैकी एका मुलाने तिला वाचविण्यासाठी नदीत उडी घेतली. मात्र, दोघेही बुडाली. आज (ता. ११) दुपारी अडीचच्या सुमारास ही दुर्दैवी घटना भांबेड येथील मुचकुंदी नदीपात्रात घडली. मयुरी घोसाळकर आणि सुशील तांबळे अशी बुडालेल्या दोन मुलांची नावे आहेत. या घटनेमुळे घोसाळकर आणि तांबळे कुटुंबावर आघात झाला आहे.

लांजा पोलिसांनी दिलेल्या माहितीनुसार लांजा तालुक्यातील गोविळ-बौद्धवाडी येथील रहिवासी असलेले आणि सध्या विरार ईस्ट येथे राहणाऱ्या संगीता तुकाराम पवार या आपल्या मुली मयुरी कमलेश घोसाळकर (वय १५), तसेच प्रतीक्षा कमलेश घोसाळकर (१२) यांच्यासह गावी आल्या होत्या. त्यांच्यासोबत सुशील गुंडाप्पा तांबळे (१४) आणि तन्मय गुंडाप्पा तांबळे (१०, दोघे रा. वरळी नाका, मुंबई) हे देखील आले होते.

संगीता पवार यांची आई वनिता तुकाराम पवार (६६) यांचा १० एप्रिलला वाढदिवस असल्याने त्या ९ एप्रिलला मोटारीने मुंबईहून गावी गोविळ-बौद्धवाडी येथे आले होते. आज (ता. ११) दुपारी जेवण आटोपून हे सर्वजण मुचकुंदी नदीवर भांबेड येथे आंघोळ आणि कपडे धुण्यासाठी गेले होते. यावेळी त्यांच्यासोबत वनिता पवार तसेच मोटारचालक रुपेश कोंडीभाऊ कंदारे असे एकूण सातजण नदीवर गेले होते. कपडे धुण्यास सुरुवात केली असताना नदीपात्रात आंघोळ करण्यासाठी प्रथम मयुरी घोसाळकर हिने उडी मारली. मात्र, नदी पात्राचा व नदीतील मोठ्या कोंडीचा (कातळकडा) अंदाज न आल्याने ती गटांगळ्या खाऊ लागली. त्यामुळे घाबरलेल्या स्थितीत मयुरी हिने आईला हाका मारल्या. तिचा ओरडा ऐकून सुशील तांबळे याने नदीत उडी मारली. ही दोघेही बुडाली. या दोघांचे मृतदेह लांजा ग्रामीण रुग्णालयात आणले असून पुढील प्रक्रिया सुरू होती.