नोकरी गेली म्हणून शेळ्या पाळल्या ; बिबट्याने मात्र गोठ्यात घुसून त्यांचा फडश्या पाडला

राजापूर (रत्नागिरी) : तालुक्‍याच्या पूर्व परिसरातील करक गावात बिबट्याच्या मुक्त संचारामुळे दहशतीचे वातावरण पसरले आहे. बुधवारी पहाटे शेळ्यांच्या गोठ्यात घुसलेल्या बिबट्याने दहा शेळ्यांना भक्ष्य केले असून, दोन शेळ्या बिबट्याच्या हल्ल्यात जखमी झाल्या आहेत. या घटनेनंतर करक गावात प्रचंड घबराट पसरली आहे.

करक-गांगणवाडी येथील भालचंद्र चंद्रकांत गांगण यांच्या मालकीच्या शेळ्यांवर बिबट्याने हल्ला केला. कोरोनाच्या महामारीमुळे नोकरी गमवावी लागलेल्या भालचंद्र गांगण यांनी आपल्या करक गावी येऊन शेळीपालन व्यवसाय सुरू केला होता. सुमारे वीस ते पंचवीस शेळ्या त्यांनी खरेदी केल्या होत्या.
भालचंद्र गांगण यांच्या घराच्या बाजूलाच शेळ्यांचा गोठा असून बुधवारी पहाटे शेळ्यांच्या ओरडण्याचा आवाज ऐकून गांगण तत्काळ उठले व गोठ्यात गेले असता आत सर्व अस्ताव्यस्त दिसले. शेळ्या कमी दिसल्या. त्यामध्ये काही शेळ्या मरून पडल्या होत्या. काही जखमी अवस्थेत होत्या तर काहींची धडपड सुरू होती. गोठ्याबाहेर दूरवरही मृतावस्थेत शेळ्या पडल्या होत्या. 

हेही वाचा - ब्रेकिंग ; प्रवाशांनी भरलेली बस ५० फूट दरीत कोसळली -

गांगण यांची आरडाओरड ऐकून झोपेतून जागे झालेले आजूबाजूचे लोक धावून आले. त्यांनी पळून जाणाऱ्या बिबट्याला पाहिले. गोठ्यात असलेल्या काही शेळ्या बिबट्याने ओढत बाहेर नेऊन त्यांना ठार केले होते. त्यांची अवस्था भयानक होती. काही शेळ्यांचे लचके तोडण्यात आले होते. काहींच्या मानाच बिबट्याने खाल्ल्या होत्या. गोठ्यात रक्ताचा सडा पडला होता. 

बिबट्याच्या तडाख्यातून वाचलेल्या शेळ्या गंभीर जखमी झाल्या होत्या. दरम्यान, बिबट्या गोठ्यातून पळून गेला होता. या घटनेनंतर भालचंद्र गांगण यांनी गावचे पोलिसपाटील महेंद्र गांगण यांच्यासह माजी सरपंच विलास नारकर यांना झाल्या प्रकाराची कल्पना दिली. त्यानंतर राजापूरचे वनाधिकारी घाडगे यांना माहिती देण्यात आली.

सव्वा लाखाचे नुकसान

ग्रामस्थ घटनास्थळी धावून आले. मृत शेळ्या गोठ्याबाहेर आणून ठेवल्या. जखमी शेळ्या तडफडत होत्या. वनविभागाचे अधिकारी कार्यालयीन कामकाजासाठी रत्नागिरीला होते. करकमधील घटनेची माहिती मिळताच ते दुपारी करकमध्ये दाखल झाले. बिबट्याच्या हल्ल्यात दहा शेळ्या ठार झाल्या. मालक भालचंद्र गांगण यांचे सुमारे लाख ते सव्वा लाखाचे नुकसान झाले असून, दोन शेळ्या जखमी आहेत.

हेही वाचा -  चिपी विमानतळ २० पर्यंत कार्यान्वित ः राऊत -

संपादन - स्नेहल कदम