Loksabha 2019 : रत्नागिरी-सिंधुदुर्गमध्ये २२ अर्ज दाखल

रत्नागिरी - रत्नागिरी-सिंधुदुर्ग मतदारसंघासाठी अर्ज दाखल करण्याच्या आज अखेरच्या दिवशी नऊ अर्ज दाखल झाले. आतापर्यंत १३ उमेदवारांनी २२ अर्ज दाखल केले. उद्या (ता. ५) अर्जांची छाननी असून ८ पर्यंत अर्ज मागे घेण्याची मुदत आहे. 
येथून काँग्रेसचे नवीनचंद्र भालचंद्र बांदिवडेकर यांनी तीन उमेदवारी अर्ज दाखल केले. समाजवादी फॉरवर्ड ब्लॉक पक्षाचे उमेदवार संजय शरद गांगनाईक यांनी आज अर्ज दाखल केला.

ते पनवेल मतदारसंघातील मतदार यादीत आहेत. महायुतीचे उमेदवार विनायक भाऊराव राऊत यांच्या नावाशी साम्य असलेल्या विनायक लवू राऊत यांनी अपक्ष म्हणून अर्ज दाखल केला. राजकीय वर्तुळात हा विषय चर्चेचा ठरला आहे. पंढरीनाथ विद्याधर आंबेरकर, नीलेश भिकाजी भातडे, नारायण दशरथ गवस यांनी अपक्ष म्हणून तर बहुजन मुक्ती पार्टी पक्षाचे उमेदवार भिकुराम काशिराम पालकर यांनी अर्ज दाखल केला.

दाखल उमेदवारांबरोबर महायुतीचे उमेदवार विनायक राऊत, महाराष्ट्र स्वाभिमान पक्षाकडून नीलेश राणे, महाआघाडीकडून नवीनचंद्र बांदिवडेकर, बहुजन वंचित आघाडीकडून मारुती ऊर्फ काका जोशी, बहुजन रिपब्लिकन सोशालिस्ट पार्टीचे राजेश जाधव, बहुजन समाज पार्टीचे किशोर वरक, अखिल भारत हिंदू महासभेचे अजिंक्‍य धोंडू गावडे असे १३ उमेदवार रिंगणात आहेत. 

पाचजणांचे शस्त्र परवाने रद्द
लोकसभा निवडणुकीच्या पार्श्‍वभूमीवर पोलिस आणि जिल्हा प्रशासनाने पाच जणांचे आत्मसंरक्षण शस्त्र परवाने रद्द करून शस्त्र जमा केली. शिवसेनेच्या काही पदाधिकाऱ्यांचा समावेश आहे. बुरंबी (ता. संगमेश्‍वर) अनंत भागोजी भाताडे, कडवई येथील महेंद्र ऊर्फ राजन नारायण कापडी, कसबा येथील राजेंद्र विष्णू महाडिक, नावडीतील सुनील श्रीकांत सुर्वे आणि कुळ्ये वाशी येथील चंद्रकांत अमृत जाधव या पाच जणांची आत्मसंरक्षण शस्त्र परवाने रद्दची कारवाई प्रशासनाने केली आहे.