यंदाचा हापूस हंगाम लांबणीवरच ?

देवगड : सिंधुदुर्गात थंडीला सुरूवात झाल्याने आंबा मोहोरासाठी पोषक वातावरण बनले आहे; पण लांबलेल्या पावसामुळे झाडांना पालवी आल्याने यंदाही हापूसचा हंगाम लांबण्याची शक्‍यता आहे. झाडांना आलेली पालवी टिकवून ठेवण्यासाठी बागायतदारांचे प्रयत्न सुरू झाले आहेत.

यंदा पावसाचे प्रमाण सुरूवातीपासून समाधानकारक राहिले; मात्र अवकाळी पावसाने ऑक्‍टोबरपर्यंत हजेरी लावली. भातशेतीच्या दृष्टीने अखेरचा पाऊस अडचणीचा ठरला. अवकाळी पावसाने शेतकऱ्यांना अडचणीत आणल्याचे चित्र होते. पाऊस लांबल्याने आंबा हंगाम यंदा लांबणीवर जाण्याची अटकळ बांधली जात होती; मात्र गेले काही दिवस वातावरणात बदल जाणवत आहे. आता किनारपट्टीवर आंबा हंगामाला पोषक वातावरण तयार होऊ लागले आहे.

हेही वाचा - महसूल राज्यमंत्र्यांकडून जनतेची दिशाभूल -

गार वाराही सुटत आहे. बदलते वातावरण आंबा बागायतदारांच्या दृष्टीने सुखावह ठरण्याची चिन्हे दिसू लागली आहेत; मात्र असे असले तरीही झाडांना आता पालवी फुटू लागली आहे. किरकोळ प्रमाणात मोहोराचे तुरे दिसत असले तरीही त्याचे प्रमाण अत्यल्प आहे. झाडांना आलेली पालवी टिकवून ठेवण्यासाठी प्रयोगशील बागायतदारांची फवारणी सुरू झाली आहे. आलेली पालवी चांगली जून झाल्यास वेळीच मोहोर येईल अशा पद्धतीने नियोजन सुरू झाले आहे.

झाडांमधून निर्धोक मोहोर बाहेर पडण्यासाठी बागायतदारांनी फवारणी सुरू केली आहे. काही प्रगतिशील आंबा बागायतदारांचे फवारणीचे नियोजन यापूर्वीच सुरू झाले आहे; मात्र यंदा पाऊस लांबल्याने थंडी पडण्यास उशिरा सुरूवात झाली. झाडांना मुबलक प्रमाणात पालवी आली आहे. त्यामुळे मोहोर येण्याची प्रक्रिया सुरळीत होण्यासाठी बागायतदार प्रयत्नशील आहेत; मात्र तूर्त तरी यंदाचा हंगाम लांबणीवर जाण्याची शक्‍यता दिसू लागली आहे.  

हेही वाचा - अधिकारी आमदारांना भेटत नाहीत; शासनाची परिपत्रके काढून कारभार करतात -

"पाऊस उशिरापर्यंत राहिल्याने आंबा कलमांना आता पालवी फुटली आहे. मोठ्या प्रमाणात झाडांना पालवी आली आहे. कलमांना आलेली पालवी जून होऊन त्यामधून मोहोर बाहेर येण्यास काही कालावधी जाईल. काही झाडांवर किरकोळ प्रमाणात मोहोर दिसतो; मात्र बहुतांशी झाडांना पालवी फुटली असल्याने यंदाचा हंगाम लांबण्याची शक्‍यता आहे."

- विनायक पारकर, ज्येष्ठ आंबा बागायतदार, वरेरी, ता. देवगड

संपादन - स्नेहल कदम