CBI रत्नागिरीत आल्यावर पोलीस अधीक्षकांना कोरोना कसा झाला? निलेश राणेंचा सवाल

रत्नागिरी : रत्नागिरीचे जिल्हा पोलीस अधीक्षक मोहितकुमार गर्ग (Superintendent of Police Mohit Kumar Garg) यांच्या मनमानीविरुद्ध भाजप नेते, माजी खासदार निलेश राणे (Nilesh Rane) आक्रमक झाले आहेत. रत्नागिरी दौऱ्यावर सीबीआयचं (CBI) एक पथक आहे. मात्र, ही टीम आल्यावरच एसपींना कोरोना कसा काय झाला? असा सूचक सवाल उपस्थित करत संबंधित यंत्रणेकडं एसपींच्या मनमानी कारभाराची माहिती देणार असल्याचं ट्विट राणेंनी केलंय.

रत्नागिरीचे (Ratnagiri) पोलीस अधीक्षक मोहितकुमार गर्ग यांच्या कार्यपद्धतीबद्दल भाजपचे नेते निलेश राणे यांनी काही दिवसांपूर्वी प्रश्नचिन्ह उपस्थित केले होते. रत्नागिरीचे पालकमंत्री अनिल परब (Anil Parab) यांच्या दापोलीतील वादग्रस्त रिसॉर्टच्या केसमध्ये अधीक्षक गर्ग यांच्या भूमिकेवर राणे यांनी सवाल उपस्थित केले होते. तर, काही दिवसांपूर्वी दापोली पोलीस स्थानकाला लागलेल्या आगीबद्दल विविध संशय व्यक्त करतानाच मोहितकुमार गर्ग सातत्यानं दापोलीत का असतात, सरकारी निवासव्यवस्था नाकारून गर्ग यांचा खासगी खर्च कोण भागवतं, दापोली पोलीस स्थानकाला आग लागल्यानंतर गर्ग थोड्या वेळातच तिथं कसं काय पोहोचले, रत्नागिरीतील त्यांच्या केबिनच्या नूतनीकरणाचा खर्च कोण करतंय, असे सवाल उपस्थित करून खळबळ उडवली होती.

त्यानंतर आता माजी खासदार निलेश राणे यांचं ट्विट रत्नागिरी जिल्ह्यात चर्चेत आलंय. ''मागच्या काही दिवसांपूर्वी मी रत्नागिरी SP मोहित कुमार गर्ग यांच्यावर आरोप केले होते. CBI ची एक टीम रत्नागिरीमध्ये 3 दिवसांसाठी दाखल झाली. या दौऱ्याची माहिती मिळताच SP यांना कोरोना झाला. काही झालं तरी संबंधित यंत्रणेकडं मी माहिती देणार, पण SP आहात म्हणून मनमानी चालणार नाही.'', असं त्यांनी ट्विट केलंय. सध्या सीबीआयची टीम रत्नागिरी दौऱ्यावर असताना निलेश राणे यांनी घेतलेला पवित्रा आक्रमक आहे.