सिंधुदुर्गात त्या सहापैकी  एका रूग्णाचा आधीच झाला होता मृत्यू... 

सिंधुदुर्गनगरी : सिंधुदुर्गात आज सापडलेल्या सहा कोरोना पॉझिटीव्ह रुग्णांपैकी एका महिला रूग्णाचा याआधीच मृत्यू झाला आहे. देवगड तालुक्यातील टेंबवली येथील ती कोरोना बाधीत 79 वर्षीय महिला असून  ती 19 मे रोजी मुंबई येथून जिल्ह्यात आली होती. त्यानंतर तिला दुसऱ्यादिवशी रुग्णालयामध्ये दाखल करून तिचा स्वॅब तपासणीसाठी घेण्यात आला होता.  23 मे  रोजी तिचा मृत्यू झाला होता. तिचा कोरोना चाचणी अहवाल आज पॉजिटीव्ह आला आहे. तिला उच्च रक्तदाब व जुनाट श्वसनाचा आजार होता. 

आज प्राप्त झालेल्या अहवालानुसार जिल्ह्यात आढळलेल्या कोरोना बाधीत रुग्णांची माहिती पुढील प्रमाणे 

हेही वाचा- मोठी बातमी - कोल्हापुरकरांची चिंता वाढली ; आणखी तीस जणांना कोरोनाची लागण
 

कणकवली तालुक्यातील बावशी येथील एक, कुडाळ तालुक्यातील कवठी येथील एक, देवगड तालुक्यातील वाडा येथील एक, वेंगुर्ला तालुक्यातील मातोंड येथील एक आणि सावंतवाडी तालुक्यातील बांदा येथील एक आणि देवगड तालुक्यातील टेंबवली येतील मृत्यू झालेल्या महिलेचा एक असे एकूण 6 अहवाल पॉजिटीव्ह आले आहेत. त्यामुळे जिल्ह्यातील रुग्णांची एकूण संख्या 30 इतकी झाली आहे. या पैकी 7 रुग्ण बरे होऊन घरी गेले आहेत. तर एका रुग्णाचा मृत्यू झाला आहे. 22 रुग्णांवर उपचार सुरू आहेत. नव्याने कोरोना बाधीत आढळलेल्या रुग्णांच्या संपर्कातील व्यक्तींचा शोध घेण्याचे काम युद्धपातळीवर सुरू आहे. या सर्व रुग्णांनी मुंबई येथून प्रवास केला आहे.