पाली नगरपंचायत निवडणूक; शिवसेनेसोबत राष्ट्रवादी काँग्रेस पक्षाची आघाडी नाही

पाली - पालीत बल्लाळेश्वराचे दर्शन घेऊन पाली नगरपंचायत निवडणूक (Pali Nagarpanchyat Election) प्रचाराचा नारळ बुधवारी (ता.15) वाढविण्यात आला. या निवडणुकीत शिवसेनेसोबत (Shivsena) राष्ट्रवादी काँग्रेस (NCP) पक्षाची आघाडी (Aghadi) नाही. या बाबत पालकमंत्री अदिती तटकरे (Aditi Tatkare) यांनी महत्वपूर्ण प्रतिपादन केले. त्या म्हणाल्या की ग्रामपंचायत, नगरपंचायत व पोटनिवडणुकीत स्थानिक परिस्थिती नुसार राजकीय समीकरण व निवडणुकीची रणनीती ठरविली जाते.

राज्यात महाविकास आघाडीच्या सरकारमध्ये शिवसेना असली तरी जिल्ह्यात अनेक ठिकाणी शिवसेना विरुद्ध शेकाप व राष्ट्रवादी अशी लढत होत आहे. यावर अदिती तटकरे म्हणाल्या की महाविकास आघाडीचे सरकार जनतेच्या सेवेसाठी अविरत काम करणारे भक्कम सरकार आहे. महाविकास आघाडी सरकारमध्ये जे मित्रपक्ष आहेत ते जनतेच्या सेवेत विकासाच्या मुद्द्यावर काम करीत आहेत. स्थानिक परिस्थिती नुसार समीकरणे वेगळी होतात.

पाली नगरपंचायत निवडणुकीत सर्वांगीण विकासकामांना प्राधान्य देणार आहोत. त्यामुळे जनतेने शेकाप व राष्ट्रवादी आघाडीला सत्तेत संधी द्यावी असे आवाहन पालकमंत्री आदिती तटकरे यांनी केले. पालीतील प्रस्तावित ग्रामीण रुग्णालय, अष्टविनायक तीर्थक्षेत्र विकास आराखडा, शुद्ध पाणीपुरवठा योजना, शहरातील अंतर्गत रस्ते, पार्किंग व्यवस्था, भाविक व भक्तांना चांगल्या सोयीसुविधा आदी लोकाभिमुख विकास कामांना प्राधान्य देण्याची भूमिका घेऊन आम्ही निवडणूक लढवत आहोत. असे देखील तटकरे म्हणाल्या. यावेळी शेकाप माजी आमदार धैर्यशील पाटील, राष्ट्रवादी काँग्रेस पक्षाच्या रायगड जिल्हा महिला अध्यक्षा गीता पालरेचा, जिल्हा परिषद सदस्य सुरेश खैरे, राष्ट्रवादी तालुका अध्यक्ष रमेश साळुंखे, युवक अध्यक्ष संदेश शेवाळे, नगरपंचायत उमेदवार, पदाधिकारी व कार्यकर्ते उपस्थित होते.