पाली : असंख्य दिव्यांनी सुधागड किल्ला लखलखला

पाली : बा रायगड परिवारातर्फे येथील सुधागड किल्ल्यावर बुधवारी (ता.3) व गुरुवारी (ता.4) अनोखी दिवाळी पहाट साजरी करण्यात आली. यावेळी किल्ल्याची साफसफाई करून विविध वास्तू व मंदिरांमध्ये हार तोरणांनी व रांगोळीने सजावट केली गेली. मशाल फेरी काढली गेली. असंख्य दिवे लावण्यात आले. त्यांनंतर विविध उपक्रम संपन्न झाले.

आदल्या दिवशी किल्ल्यावरील पंत सचिव वाडा, महादरवाजा, भोराई, महादेव व मारुती मंदिर येथे साफसफाई करण्यात आली. त्यानंतर आकाश कंदिल लावण्यात आली. झेंडूच्या फुलांच्या माळा लावून सजावट केली गेली. बा रायगडचा सदस्य अमोल सुर्वे यांनी सगकीकडे झेंडूच्या फुलांच्या पाकळ्या वापरुन रांगोळी काढली. नंतर सायंकाळी सर्व वास्तूंमध्ये दिवे (पणत्या) लावून झगमगाट केला गेला. दिव्यांनी शिवाजी महाराजांचे नाव काढण्यात आले.

महाराजांची रांगोळी काढली गेली. रात्री भोजन उरकून पंत सचिवांच्या वाड्यातून महादरवाजात व पुन्हा महादरवाजातून भोराई मंदिरात व नंतर पंत सचिवांच्या वाड्यात मशाल मिरवणूक काढण्यात आली. रात्री भजन करण्यात आले. त्यानंतर पहाटे ४ वाजता उठून दिव्यांची रोशनाई करुन दिवाळी पहाट साजरी करण्यात आली. सर्व वास्तुनां मधे सकाळी 10 वाजता आलेल्या सर्व गड प्रेमींना चहा नास्ता देऊन या अनोख्या कार्यक्रमाची सांगता करण्यात आली.

या उपक्रमास दत्तात्रेय सावंत, प्रतीक इंदुलकर, विजय गावंड, दत्ता भोसले, शेखर तांबट, याज्ञील सावंत, प्रज्योती जाधव, खुशी थळे आदींसह, रायगड जिल्ह्यातील व मुंबई, पुणे, ठाणे, डोंबिवली असे महाराष्ट्रातील दुर्गप्रेमी सहभागी झाले होते. यामध्ये मुलींचा सहभाग उल्लेखनीय होता.