चिपळूण : अतिवृष्टीनंतर तत्काळ करण्यात येणारी कामे सदस्यांनी सुचवल्यानंतर ती मंजूर झाल्याची माहिती तत्कालीन बांधकाम अधिकाऱ्यांनी सभागृहात दिली होती; मात्र प्रत्यक्षात या मंजूर कामांची यादी मंगळवारी झालेल्या पंचायत समितीच्या मासिक सभेत सदस्यांना मिळाल्यानंतर त्यात सुचवलेल्या कामाऐवजी वेगळीच कामे समाविष्ट करण्यात आल्याचे दिसून आले. यामुळे आक्रमक झालेल्या सदस्यांनी अखेर याचा जोवर खुलासा होत नाही, तोवर सभागृहातून उठणार नाही, असा पवित्रा घेत सभेचे कामकाज रोखले.संबंधित सदस्यांची जिल्हा परिषदेच्या मुख्य कार्यकारी अधिकाऱ्यांशी दूरध्वनीवरून चर्चा झाली.
या संदर्भात ६ ऑक्टोबर रोजी बैठक घेण्याचा निर्णय झाल्यानंतर सायंकाळी ५ वाजता बैठक संपली. येथील पंचायत समितीची मासिक सभा सभापती रिया कांबळे यांच्या अध्यक्षतेखाली झाली. या वेळी सहाय्यक गटविकास अधिकारी प्रकाश भोसले यांच्यासह विविध खात्याचे अधिकारी व सदस्य उपस्थित होते. सभेत बांधकाम विभागाच्या आढाव्यादरम्यान अतिवृष्टीनंतर तत्काळ करण्यात येणारी खेर्डी गणातील दोन रस्त्यांची कामे सदस्य नितीन ठसाळे यांनी सुचवली होती. विशेष म्हणजे त्यांनी सुचवलेली ही दोन कामे सप्टेंबर महिन्यात झालेल्या मासिक सभेत तत्कालीन बांधकाम विभागाचे उपअभियंता अरविंद टी. के. यांनी मंजूर झाल्याची माहिती सभागृहापुढे दिली होती;
मात्र मंगळवारच्या मासिक सभेत अतिवृष्टीदरम्यान मंजूर कामांची यादी सदस्यांनी मागितल्यानंतर त्यात मंजूर कामाऐवजी भलतीच कामे समाविष्ट केल्याचे सदस्यांच्या निदर्शनास आले. यावरून संतापलेल्या नितीन ठसाळे यांनी आक्रमक पवित्रा घेतला. बांधकाम विभागाचे अधिकारी सदस्यांची दिशाभूल करीत आहेत. कामे मंजूर करताना त्यांचा मनमानी कारभार सुरू आहे. यावर खरी माहिती मिळत नाही तोवर आम्ही सभागृहातून उठणार नाही, असा पवित्रा इतर सदस्यांनी घेतला.
एकत्रित बैठक बुधवारी होणार
दरम्यान, सभागृहाचे कामकाज सदस्यांनी तीन तास रोखले. या संदर्भात थेट रत्नागिरी मुख्य कार्यकारी अधिकाऱ्यांना तसेच गटविकास अधिकारी प्रशांत राऊत यांना फोन लावून कल्पना देण्यात आली. अखेर या प्रश्नी गटविकास अधिकाऱ्यांसमेवत सर्व सदस्य व बांधकाम विभागाचे अधिकारी यांची एकत्रित बैठक बुधवारी घेण्याचे ठरले.
पूरग्रस्तांचे गांभीर्य नाही
चिपळुणातील महापूर व अतिवृष्टीने भूस्खलन झालेल्या नुकसानीची पाहणी करण्यासाठी मंगळवारी केंद्रीय समिती आली. या समितीने पेढे या ठिकाणी पाहणी केली; मात्र ही समिती येणार असल्याची माहिती तिथल्या सदस्य व सभापतींनाही नव्हती. महापुरानंतर अडीच महिन्यांनंतर ही समिती नुकसानीची पाहणी करण्यास येत असेल, तर त्यांना पूरग्रस्तांचे गांभीर्य नसल्याचे सदस्य राकेश शिंदे यांनी सांगितले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
