आता बनावट प्रॉपर्टी कार्डला बसणार आळा

रत्नागिरी : सातबारा उताऱ्यानंतर डिजिटल स्वाक्षरी असलेले प्रॉपर्टी कार्ड भूमिअभिलेख विभागामार्फत ऑनलाइन मिळणार आहे. त्यामुळे घरबसल्या प्रॉपर्टी कार्ड पाहणे लाभार्थ्यांना शक्‍य होईल. या सुविधेमुळे वेळेची बचत होणार असून, बनावट प्रॉपर्टी कार्डला आळा बसेल. जिल्ह्यात ८८ हजार ५६४ प्रॉपर्टी कार्ड असून, त्यातील ३३ हजार ९५४ कार्डवर डिजिटल स्वाक्षरी झाली आहे.

भूमिअभिलेख विभागाकडून नागरिकांना विविध प्रकारच्या सेवा ऑनलाइन दिल्या जात आहेत. त्यासाठी केंद्र सरकारने धोरण निश्‍चित केले आहे. अभिलेखांचे संगणकीकरण, फेरफार प्रकियेत सुटसुटीतपणा आणि किमान मानवी हस्तक्षेप या तत्त्वांचा स्वीकार करण्यात येत आहे. या पार्श्वभूमीवर डिजिटल स्वाक्षरी असलेले प्रॉपर्टी कार्ड नागरिकांना ऑनलाइन उपलब्ध करून देण्याचा उपक्रम राबविला जात आहे. यामुळे विभागाचे कामकाज गतिमान आणि पारदर्शक होणार आहे.

हेही वाचा - एका बंदिस्त खोलीत अवैध गोवा बनावटीचा विदेशी मद्याचा साठा सापडला

नागरिकांना भूमापन कार्यालयात जावे लागणार नाही. घरबसल्या प्रॉपर्टी ऑनलाइन मिळणार आहे. प्रॉपर्टी कार्ड देताना ऑनलाइन पैसे भरण्याची सुविधाही उपलब्ध करून दिली आहे. ऑनलाइन प्रॉपर्टी कार्डची सुविधा उपलब्ध करून दिल्याने बनावट प्रॉपर्टी कार्डला आळा बसेल. यामधून फसवणूक टळणार आहे. जिल्ह्यात ३३ हजार ९५४ कार्डवर डिजिटल स्वाक्षरी झाली असून ३३ हजार ७७४ कार्ड ऑनलाइन अपलोड करण्यात 
आली आहेत.

संकेतस्थळावर प्रॉपर्टी कार्ड

डिजिटल स्वाक्षरी असलेले ऑनलाइन प्रॉपर्टी कार्ड उपलब्ध करून देण्यासाठी राज्य सरकारने यापूर्वीच दर निश्‍चित करून दिले आहेत. त्यानुसार शहरी भागातील मिळकतीचे प्रॉपर्टी कार्ड दिले जाणार आहे. www.digitalsatbara.mahabhumi.gov.in संकेतस्थळावर ऑनलाइन प्रॉपर्टी कार्ड मिळणार आहे. प्रॉपर्टी कार्डसाठी ऑनलाइन पैसे भरण्याची सुविधादेखील उपलब्ध करून दिली आहे.

संपादन - स्नेहल कदम