कोकणात अवकाळीचा जोर ; आंबा, काजू बागायती संकटात

सावंतवाडी (सिंधुदुर्ग) : जिल्ह्यात दोन तीन दिवसांपासून काही भागांत मुसळधार तर काही ठिकाणी हलक्‍या स्वरूपाचा पाऊस पडला. 5 दिवसांपासून जिल्ह्यामध्ये हवामान ढगाळ राहिले आहे. गेल्या पाच दिवसांत 13.72 एवढ्या सरासरीने पाऊस झाला आहे. एकूण 109.8 मिलिमीटर एवढा पावसाची नोंद जिल्ह्यात झाली आहे. सर्वाधिक पाऊस दोडामार्ग सावंतवाडी व वेंगुर्ले तालुक्‍यात पडल्याची नोंद आहे. 

पाच दिवसांपासून जिल्ह्यात कमी मध्यम व मोठ्या स्वरूपाचा पाऊस झाला. यात सर्वाधिक पाऊस दोडामार्ग, सावंतवाडी या दोन तालुक्‍यांत म्हणजेच जिल्ह्याच्या दक्षिणेकडील भागात झाला. तर वेंगुर्लेमध्ये 19.8 मिलिमीटर झाला. त्यामुळे या तालुक्‍यांतील आंबा व काजू फळ पिके संकटात सापडली आहेत. बदलते हवामान परिस्थितीत आंबा व काजू पिकांची काळजी घेण्याचे आवाहन वेंगुर्ले प्रादेशिक फळ संशोधन केंद्रातर्फे करण्यात आले आहे.

हेही वाचा -  ग्रामस्थांचा गावपातळीवर बैठकांचा सपाटा सुरू

सध्या काजू व आंबा पिकांना फळधारणा होण्यास सुरुवात झाली आहे. या वातावरणामुळे मोहोरावर करपा रोगाचा प्रादुर्भाव होण्याची शक्‍यता आहे. त्यामुळे फळधारणेवर विपरीत परिणाम होऊ शकतो. जी फळधारणा झाली आहे, अशा फळांवर करपा रोगाचे काळे डाग पडण्याची शक्‍यता आहे. त्यासाठी डॉ. बाळासाहेब सावंत कोकण कृषी विद्यापीठाने शिफारस केलेले कार्बेन्डझिम 50 टक्के किंवा थायोफीनेट 70 टक्के यापैकी कोणतेही एक बुरशीनाशक एक लिटर पाण्यात एक ग्रॅम या प्रमाणात घेऊन फवारणी करावी.

ढगाळ वातावरणात तुडतुड्याचा प्रादुर्भाव वाढल्यास कीटकनाशकांची फवारणी करावी. आज सकाळच्या सुमारास काहीसे ढगाळ व काहीसे निरभ्र वातावरण दिसून आले; मात्र बागायतदारांची चिंता काही कमी झालेली दिसून येत नाही. 

हेही वाचा -  आता जिल्हा प्रशासनाची तारांबळ थांबणार

आतापर्यंतचा पाऊस मि.मीमध्ये 

दोडामार्ग 37, सावंतवाडी 23, वेंगुर्ले 19.8, कुडाळ 10, मालवण 10, कणकवली 2, देवगड 3, वैभववाडी 5, एकूण 109.8, सरासरी 13.72.  

संपादन - स्नेहल कदम