रत्नागिरीत शिवसैनिक आक्रमक; आमदारांसह, कार्यकर्त्यांचे फलक फाडो आंदोलन

रत्नागिरी - कालच्या नारायण राणे यांच्या मुख्यमंत्री उद्धव ठाकरे (cm uddhav thackeray) यांच्या विरोधातील व्यक्तव्यानंतर संपूर्ण महाराष्ट्रात शिवसैनिक पेटले आहेत. याचे पडसाद रत्नागिरीतही पाहायला मिळाले आहेत. लांजा-राजापूर विधानसभेचे आक्रमक आमदार राजन साळवी यांनी आपल्या कार्यकर्त्यांसह शहरात केंद्रीय मंत्री नारायण राणे (narayan rane) यांच्या स्वागतासाठी लावलेले बॅनर फाडले. नारायण राणे यांच्या विरोधात घोषणाबाजी केली. या आंदोलनात रत्नागिरीचे (ratnagiri update) शहराचे शिवसेना शहर संघटक प्रसाद सावंत यांनी आक्रमक भूमिका घेत मारुती मंदिर येथे केलेल्या फलक फाडो आंदोलनात महत्वाची भूमिका बजावली.

यावेळी आमदार राजन साळवी (rajan salavi) यांनी स्वतः पुढाकार घेत नारायण राणे यांच्या व्यक्तव्याचा निषेध केला. मुख्यमंत्री व पक्ष प्रमुख यांच्या विरोधात वक्तव्य केल्याप्रकरणी शिवसेना रत्नागिरी सह संपर्कप्रमुख राजेंद्र महाडिक व राजापूर-लांजा-साखरपा विधानसभा मतदारसंघाचे आमदार डॉ. राजन साळवी, विधानसभा क्षेत्रप्रमुख प्रमोद शेरे, उप जिल्हाप्रमुख महेश म्हाप, संजय साळवी, तालुकाप्रमुख प्रदीप उर्फ बंड्या साळवी बिपीन बंदरकर ह्यांच्या नेतृत्वाखाली रत्नागिरी शहरामध्ये जोरदार आंदोलन करण्यात आले.

रत्नागिरी शिवसैनिकांनी केली तक्रार

मुख्यमंत्री उद्धव ठाकरे यांच्या विरोधात केलेल्या वादग्रस्त वक्तव्यानंतर महाराष्ट्रात ठिकठिकाणी शिवसैनिक तक्रारी दाखल करत आहेत. आत्ता काही वेळापूर्वी रत्नागिरीतील शिवसैनिकांनीही शहर पोलिस स्थानक गाठले असून या ठिकाणी केंद्रीय मंत्री नारायण राणे यांच्याविरोधात तक्रार दिली आहे.