बांदाः मुंबई-गोवा महामार्गावर सटमटवाडी येथे अनोळखी वाहनाने पाठीमागून धडक देऊन १०० मीटर फरफटत नेल्याने दुचाकीस्वार निवृत्त एसटी बस चालक उत्तम दत्ताराम पडवळ (वय ७१, रा. डेगवे-बाजारवाडी) यांचा जागीच मृत्यू झाला. अपघाताची घटना रविवारी दुपारी एकच्या सुमारास घडली. बांदा पोलिसांत अनोळखी चालकाविरोधात सदोष मनुष्यवधाचा गुन्हा दाखल करण्यात आला आहे.
पोलिसांनी दिलेली माहिती अशी, महामार्गावर सटमटवाडी येथे बॉक्सवेलचे काम सुरू आहे. हे अपघातस्थळ असून याठिकाणी आतापर्यंत अनेकांना अपघातात जीव गमवावा लागला आहे. उत्तम हे गोव्यात कामानिमित्त गेले होते. दुचाकीने (एमएच ०७ यू ८२१९) ते गोव्यातून बांद्याच्या दिशेने येत होते. दुपारी एकच्या सुमारास त्यांच्या दुचाकीला पाठीमागून भरधाव येणाऱ्या अनोळखी वाहनाने जोरदार धडक दिली. त्यामध्ये त्यांच्या डोक्याला गंभीर दुखापत झाली. रस्त्यावर रक्ताचा सडा पडला होता. दुपारची वेळ असल्याने वाहतुकीची वर्दळ कमी होती. त्यामुळे कुठल्या वाहनाने दुचाकीला ठोकर दिली हे समजू शकले नाही.
अपघातानंतर वाहन चालकाने पलायन केले. अपघातानंतर स्थानिकांनी घटनास्थळी धाव घेतली. मात्र, उत्तम यांच्या डोक्यातून मोठ्या प्रमाणात रक्तस्त्राव झाल्याने त्यांचा जागीच मृत्यू झाला. बांदा प्रभारी पोलिस निरीक्षक संजय कातिवाले यांच्यासह बांदा पोलिसांनी तातडीने घटनास्थळी धाव घेत पंचनामा केला. बांदा प्राथमिक आरोग्य केंद्रात विच्छेदन करून मृतदेह सायंकाळी उशिरा नातेवाइकांच्या ताब्यात दिला. त्यांच्या मागे २ मुलगे, १ मुलगी, भाऊ असा परिवार आहे. ट्रान्स्पोर्ट व्यावसायिक प्रसाद पडवळ यांचे ते वडील होत. त्यांचा भाचा रवीशेखर सदाशिव कुडव यांनी बांदा पोलिसांत फिर्याद दिली आहे. पोलिस महामार्गावरील सीसीटीव्ही फुटेजची तपासणी करत आहेत. उत्तम यांना धडक देऊन पलायन केलेली गाडी बांदा शहराच्या दिशेने गेली असून त्यादृष्टीने माहिती घेतली जात आहे.
अपघातस्थळ बनले मृत्यूस्थळ
आज ज्याठिकाणी अपघात होऊन उत्तम यांचा मृत्यू झाला ते अपघातस्थळ मृत्यूस्थळ बनले आहे. आतापर्यंत याठिकाणी झालेल्या अनेक अपघातांत ११ जणांना आपला प्राण गमवावा लागला आहे. त्यामुळे महामार्गावरील सर्वात धोकादायक अपघात स्थळात या ठिकाणाचा समावेश आहे.
विना अपघात चालक म्हणून प्रसिद्ध
उत्तम हे एसटी चालक म्हणून निवृत्त झाले होते. आपल्या सेवेतील कार्यकाळात ते विना अपघात चालक म्हणून परिचित होते. सावंतवाडी, दोडामार्ग तालुक्यातील अनेक गावात त्यांनी चालक म्हणून सेवा बजावली होती. वेळेमध्ये ठरलेल्या ठिकाणी पोहोचवण्याचे त्यांचे कसब होते. त्यामुळे सुरक्षित प्रवास म्हणून प्रवाशांमध्ये ते सुपरिचित होते. त्यांना कलाकारीची देखील प्रचंड आवड होती.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.