रोहेकर उतरले रस्त्यावर; रॅली काढून नगरपलिकेला दिले निवेदन

रोहा : ''कुंडलिकेच्या पात्रात माती भराव करु नका, नदीचे पात्र आरुंद करु नका, नदीच्या पावसाळी प्रवाहाला बाधित करणारा आणि धोकादायक असलेला माती भराव त्वरित काढून टाका'' ,यामागणी साठी रोहेकर सोमवारी रस्त्यावर उतरले होते. नदीचे पात्र वाचविण्यासाठी गावातून रॅली काढण्यात आली. यावेळी रोहा नगर पलिकेला कुंडलिका बचाव संघर्ष समितीच्या माध्यमातुन दिडशेहून अधिक नागरिकांच्या सहयांचे निवेदन देण्यात आले आहे. 

रोहेकरांची जिवनदायिनी असलेल्या कुंडलिका नदीत संवर्धनाचे काम सूरु असुन त्यासाठी नदीच्या पात्रात मोठ्या प्रमाणात मातीचा भराव टाकुन आणि बांधकाम करुन नदीचे पात्र अरूंद केले जात आहे. परिणामी कुंडलिका नदीचे नैसर्गिक अस्तित्व धोक्यात आले आहे. पात्रात दोन्ही किनारी सिमेंटच्या भिंती तयार करण्याचे काम सुरू आहे. यामुळे नदीपात्र बंदिस्त होणार आहे. ही परिस्थिती पहाता नदीच्या प्रवाहात अडथळा निर्माण होईल असे कोणतेही काम करु नये. त्याच बरोबर पुररेषेत होत असलेल्या या भराव तातडीने थांबण्यात यावा तसेच पूररेषेत कोणतेही नियमबाहय बांधकाम करु नये या मागणीसाठी रोहेकरांनी शहरातील राम मारुती चौक ते रोहा नगर परिषद दरम्यान भव्य रॅली काढली.

या रॅलीचे नेतृत्व ज्येष्ठ पत्रकार दिलिप वडके, सामाजिक कार्यकर्ते अप्पा देशमुख, अ‍ॅड. मनोजकुमार शिंदे, संतोष खटावकर, सुरेश मगर, राजेंद्र जाधव, अ‍ॅड. हर्षद साळवी यांनी केले. तर माजी नगराध्यक्ष समीर शेडगे, संदीप तटकरे, आदिंनी उपस्थित राहुन या लोक चळवळीस सक्रिय पाठिंबा दर्शविला. नगर पालिकेच्या आवारात येताच रॅलीचे सभेत रूपांतर झाले. यावेळी अ‍ॅड. मनोजकुमार शिंदे, सुरेश मगर, समीर शेडगे, संदीप तटकरे, राजेंद्र जाधव आदिंनी उपस्थितांना संबोधित केले. यारॅलीमध्ये दोनशेहून अधिक नागरिक उत्स्फूर्तपणे सहभागी झाले होते. रोहयाचे मुख्याधिकारी बाळासाहेब चव्हाण यांनी रॅलीला सामोरे जात निवेदन स्विकारले. तसेच निवेदनाचा सर्वकषपणे विचार करुन आपल्या मागण्यांवर सकारात्मक निर्णय घेण्यात येईल असे त्यांनी यावेळी स्पष्ट केले.