बांदा (सिंधुदुर्ग) - गाळेल-वरचीवाडी येथील काजू बागायतीत असलेल्या ओहोळात आज सकाळी जखमी अवस्थेत आढळलेल्या सांबराचा उपचारादरम्यान मृत्यू झाला. सांबराच्या शरीरावर जखमा असल्याने जंगलातील झटापटीत सांबर जखमी झाल्याचा प्राथमिक अंदाज व्यक्त होत आहे; मात्र पाठीवरील जखमा खोल असल्याने शिकारीच्या उद्देशाने हल्ला झाल्याची शक्यता देखील नाकारता येत नाही. वनखात्याचे वरिष्ठ अधिकारी वेळेत घटनास्थळी दाखल न झाल्याने स्थानिकांनी संताप व्यक्त केला.
याबाबत सविस्तर माहिती अशी की, आज सकाळी 7 वाजण्याच्या सुमारास येथील शेतकरी विलास नाडकर्णी हे आपल्या घरालगत असलेल्या काजू बागायतीमध्ये गेले असता त्यांना एक भलेमोठे सांबर ओहोळातील अडचणीत जखमी दिसले. त्यांनी याची कल्पना पोलिसपाटील चंद्रकांत बांदेकर यांना दिली. श्री. बांदेकर यांनी तत्काळ येथील पोलिस व वनखात्याला खबर दिली.
तब्बल दोन तास वनखात्याचा कोणीही अधिकारी किंवा कर्मचारी घटनास्थळी पोहचला नसल्याने स्थानिकांनी नाराजी व्यक्त केली. पाठीवर जखमा असल्याने व पाठीमागील दोन्ही पाय जायबंदी असल्याने सांबर वेदनेने विव्हळत होते. सकाळी 9 वाजता वाईल्ड लाईफ इमर्जन्सी रेस्क्यु टिमचे अनिल गावडे, तुषार विचारे, वैभव आमडोसकर, वनविभागाचे दत्तात्रय शिंदे, वनरक्षक संतोष गोजारे, रमेश पाटील, शशिकांत देसाई, मनोहर गावडे, पशुवैद्यकीय अधिकारी डॉ. संदिप संसारे घटनास्थळी दाखल झाले. सांबरावर प्राथोमपचार करण्यात आले. सावंतवाडी येथे उपचारासाठी आणले असता तेथे त्याचा मृत्यू झाला. सावंतवाडी या सांबरावर अंत्यविधी करण्यात आले.
जखमांबाबत संशय
जखमी सांबराच्या पाठीवर व पायावर खोल जखमा होत्या. या परिसरात सांबराची मोठ्या प्रमाणात शिकार होते. या सांबरावर शिकारीच्या उद्देशाने हल्ला केल्याची चर्चा उपस्थितांमध्ये होती; मात्र जंगलात झालेल्या झटापटीत जखमा होण्याची शक्यता डॉ. संसारे यांनी व्यक्त केली. सावंतवाडीत अधिक उपचार करताना जखमांबाबत स्पष्टता होईल, असे त्यांनी सांगितले.
स्थानिकांचे मदतकार्य
वनखात्याचा एकही वरिष्ठ अधिकारी उपस्थित नसल्याने वनरक्षक केवळ बघ्याची भूमिका घेत होते. स्थानिकांनी मदतकार्य केले. पशुवैद्यकीय अधिकारी डॉ. संसारे यांनी पत्रकारांना वृत्तसंकलन व छायाचित्रण करताना रोखण्याचा प्रयत्न केला. यावेळी संतप्त स्थानिकांनी वनरक्षकांना धारेवर धरत वरिष्ठ उपस्थित नसल्याबाबत जाब विचारला. सांबराला नेण्यासाठी वाहनाची व्यवस्था नसल्याने सांबर तब्बल एक तास विव्हळत होते, असे ग्रामस्थांनी सांगितले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.