सिंधुदुर्ग : करूळ, कुंभवडेत दानपेट्या फोडल्या

सिंधुदुर्ग : एका रात्रीत तालुक्यातील करूळ आणि कुंभवडे येथील तीन मंदीरा:तील दानपेट्या अज्ञात चोरट्यांनी फोडल्या. रोख रक्कम आणि घंटा देखील त्यांनी चोरट्यांनी लंपास केल्या. ऐन दिवाळीच्या धामधुमीत चोरटे पुन्हा सक्रीय झाल्यामुळे तालुक्यात खळबळ माजली आहे.

तालुक्यातील कुंभवडे येथे एकविरा देवीचे मंदीर आहे. या मंदीरात आज सकाळी एकनाथ काशिराम राऊत हे पुजेसाठी गेले असता त्यांना मंदीरातील दानपेटी फोडलेली असल्याचे दिसून आले. त्यांनी ही माहिती मंदीर व्यवस्थापनासह वैभववाडी पोलीस स्थानकात दिली. या घटनेची माहिती मिळताच पोलीस उपनिरीक्षक प्रवीण देसाई आणि त्यांचे कर्मचारी कुंभवडे येथे पोहोचले. तेथील पंचनामा सुरू असतानाच करूळ गावठण येथील केदारलिंग मंदीर आणि करूळ भोयडे येथील गणपती मंदीरातील दानपेटी फोडण्यात आल्याची माहिती पोलिसांना मिळाली. त्यामुळे पोलिसांनी करूळ गाठले.

कुंभवडे येथील एकविरा मंदीराच्या दानपेटीत ५ हजार रूपये तर करूळ भोयडे गणपती मंदीरातील दानपेटी अंदाजे २००० रूपये तर केंदारलिंग मंदीरातील ५०० रूपये अशी एकुण ८ हजार रूपयांची रोखड चोरीस गेली. गणपती मंदीरातील दोन घंटा देखील चोरट्यांनी चोरल्या आहेत. एकाच रात्रीत चोरट्यांनी तीन मंदीरातील दानपेट्या फोडल्यामुळे तालुक्यामध्ये खळबळ माजली आहे. या चोऱ्यांमुळे दानपेट्या फोडणारे चोरटे पुन्हा सक्रीय झाले असण्याची शक्यता व्यक्त केली जात आहे. या चोऱ्यांमुळे तालुक्यात खळबळ माजली आहे.

काही वर्षापुर्वी मंदीरातील दानपेट्या फोडण्याचे अनेक प्रकार तालुक्यात घडले होते. त्यानंतर पोलीसांनी रात्रीच्या गस्तीचे प्रमाण वाढविले होते. गेली दोन तीन वर्ष तालुक्यात चोऱ्यांचे प्रमाण त्या तुलनेत कमी होते; परंतु एकाच रात्रीत तीन मंदीरातील चोरी करून चोरट्यांनी पुन्हा सक्रीय झाल्याचे संकेत दिले आहेत.