सिंधुदुर्ग : दोडामार्गला वादळी पावसाचा तडाखा | Sakal
sakal

बोलून बातमी शोधा

पावसाचा तडाखा

सिंधुदुर्ग : दोडामार्गला वादळी पावसाचा तडाखा

दोडामार्ग: दोडामार्ग तालुक्याला काल (ता. २७) रात्री वादळी पावसाने जोरदार तडाखा दिला. दोडामार्ग तालुक्यात नुकसानीची तीव्रता अधिक आहे. विशेषतः कुंब्रल परिसरात वादळामुळे मोठी हानी झाली. गेले चार दिवस उष्मा प्रचंड वाढला आहे. काल रात्री दहाच्या दरम्यान अचानक विजांच्या कडकडाटासह सोसाट्याचा वारा सुरू झाला. जिल्ह्याच्या अनेक भागांत याचा प्रभाव होता. दोडामार्ग आणि सावंतवाडी तालुक्यात याची तीव्रता वाढली.

वादळी वाऱ्‍यासह पावसालाही सुरुवात झाली. यामुळे अनेक ठिकाणी झाडे पडून नुकसान झाले. दोडामार्ग तालुक्यातील कुंब्रल आणि कोलझर परिसराला वादळाचा तडाखा बसला. तळकट, कोलझर भागांत वाऱ्‍याने नारळ, सुपारी बागांचे मोठे नुकसान झाले. कोनाळकट्टा आणि कुंब्रल येथे वित्तहानी झाली. कोनाळकट्टा येथे वीज पडल्याने अंगणातील सागाचे झाड अर्ध्यावरून मोडून पडले. फांद्या तुटून बाजूच्या गाडीवर पडल्या. कुंब्रल येथील बोर्डेकरवाडीत माड घरावर पडून घर कोसळले. विजांचा लखलखाट आणि ढगांचा गडगडाट आणि वादळी वाऱ्‍यासह जवळपास अर्धा तास मुसळधार पाऊस कोसळला. वादळी वाऱ्‍यामुळे अनेक ठिकाणी झाडे, झाडाच्या फांद्या कोसळल्या. महावितरणचेही नुकसान झाले. अनेक भागांत वीजपुरवठा विस्कळीत होता.

कोनाळकट्टा येथे राजन आरोलकर व प्रकाश कर्पे यांचे कालच्या पावसामुळे नुकसान झाले. वीज पडल्याने सागाच्या फांद्या गाडीवर पडून नुकसान झाले. कुंब्रल बोर्डेकरवाडी येथील संतोष बोर्डेकर यांच्या घरावर माड पडल्याने नुकसान झाले. दोन दुचाकींचीही मोडतोड झाली. शिवसेनेचे उपजिल्हाप्रमुख बाबूराव धुरी यांनी बोर्डेकर यांच्या झालेल्या नुकसानीची पाहणी करून शासकीय मदत मिळवून देण्याची ग्वाही दिली. सावंतवाडी तालुक्यातही ग्रामीण भागात वादळी पावसाने तडाखा दिला. शहरात विजेच्या तांडवासह पाऊस झाला. यामुळे उशिरापर्यंत वीजपुरठा खंडित होता. ग्रामीण भागात काही ठिकाणी, तर आज सकाळपर्यंतवीज बंद होती.

Web Title: Sindhudurg Rains Update Marg

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top